– Homodebatt fører til stor valdeltaking

– Eg opplever at veldig mange er opptekne av kyrkjevalet, som ikkje har vore opptekne av det før, seier leiar i Landsforeininga for lesbiske og homofile (LLH), Bård Nylund til NRK.

Torsdag kveld fekk han med seg ein debatt om vigsel av homofile i kyrkja under Skeive Sørlandsdager.

Ein debatt som definitivt ikkje nådde kokepunktet. Debattantane vart til og med omtala som eit «roleg og disiplinert panel» med «innestemmer» av debattleiaren.

– Frykteleg spennande

– Det er viktig med ein slik debatt for å synleggjere skilnadene. Nokon ynskjer ei kyrkje for mange, medan andre vil køyre på med ei kyrkje for dei få, meiner Nylund.

Det er første gong at det vert stilt to lister ved kyrkjevalet. Open Folkekyrkje vart starta etter Kyrkjemøtet i fjor. Dei jobbar for likekjønna ekteskap i kyrkja.

Kjetil Drangsholt i Open Folkekyrkje støttar Nylund og trur på langt fleire stemmer enn ved tidlegare kyrkjeval.

– Eg såg ei analyse som antyda at 37 prosent av kyrkja sine medlemmer vil stemme. Sist gong var det 13,5, så det er gedigent. Eg trur vi vil få mange stemmer og eg ser fram til valet med glede. Det er frykteleg spennande.

– Kan gå begge vegar

Øivind Benestad i Levande Folkekyrkje har allereie signalisert at han melder seg ut av kyrkja dersom det vert opna for homofil vigsel der. Også han trur på stor valdeltaking.

– Det er utruleg ope. Ingen veit korleis dette vil gå, men det er veldig spennande, seier han til NRK.

– Det er mange i samfunnet, også dei som ikkje er aktive kyrkjegjengarar, som er einige i at ekteskapet er for mann og kvinne. At mange vil stemme betyr ikkje at Open Folkekyrkje vil få stemmene. Her kan det gå begge vegar, seier han.

Biskop i Agder og Telemark, Stein Reinertsen trur også at fleire enn tidlegare vil stemme ved årets kyrkjeval.

– Mykje tyder på at dette valet engasjerer meir enn tidlegare. Temperaturen i denne saka har nok ein del å seie i samband med det, seier han.

Trur på homofil vigsel raskt

Biskopen har sjølv vore open på at han er imot å vie homofile i kyrkja.

Bård Nylund i LLH trur vigsel av homofile i kyrkja kan vere ein realitet innan kort tid.

– Eg trur ikkje det er lenge til det er på plass ein liturgi som opnar for at likekjønna par kan inngå ekteskap i kyrkja, seier han.

Øivind Benestad i Levande Folkekyrkje trur derimot at det vil ta lengre tid, om det nokon gong vil skje.

– Det vil ta eitt, to eller tre år uansett. I alle fall to om det skulle bli slik. Det blir alt for kort tid før neste kyrkjemøte, seier han.