– Det er kun å senke skuldrene, gle seg og gi dei skikkeleg kamp. Vi har ingenting å tape i ein slik kamp, seier Start-trenar Mons Ivar Mjelde til NRK.
Sørlendingane har fått ein god start på sesongen. Med siger mot Hønefoss og uavgjort mot Tromsø er dei gule og svarte ubegsigra så langt.
– Har ikkje respekt for Rosenborg
Men fredagens motstandar Rosenborg har vunne alle sine tre første kampar og står med 9-0 i målskilnad. Søndag knuste dei Sogndal 4-0 på Fosshaugane Campus.
– Vi har fått ein god start på sesongen vi også. Vi har ikkje respekt for Rosenborg sjølv om vi veit at dei er gode, seier stoppar Jesper Mathisen.
– Vi går alltid for å vinne kampen, og vi er faktisk så naive at vi trur at vi kan gjere det også, seier Mjelde.
Start er eitt av laga som har ein ok statistikk på Lerkendal. Sidan år 2000 har laga møttest ti gonger i Trøndelag. Start har teke poeng i tre av oppgjera.
Møter Lund Hansen
– Eg veit at Start har gjort det bra på Lerkendal tidlegare. Det er fordi dei har turt. Veldig mange lag kjem til Lerkendal og legg seg bakpå, seier Mjelde.
– Vi ynskjer at det same skal kjenneteikne oss på Lerkendal, som her på Sør Arena, seier Start-trenaren.
På Lerkendal fredag får Start-gutta også eit gjensyn med Alexander Lund Hansen, som forlot Sørlandet til fordel for trøndarane i august i fjor.
– Vi kjenner alle svakheitene hans, og det er mange skal eg seie deg, ler Jesper Mathisen.