Det var dommaren sjølv som tok kontakt med politiet etter finalen i bedriftsturneringa.
– Han var ganske oppskaka då han ringde. Han forklarte at ein av spelarane hadde teke kvelartak på han. I tillegg skal han ha blitt slått ned, seier operasjonsleiar i Agder-politiet, Magne Storaker til NRK.
Ei politipatrulje vart send til Sørlandshallen då dommaren ringde. Då politiet kom til staden hadde spelaren, som er i 20-åra, reist frå hallen saman med resten av laget.
Veit kven som slo
Ifølgje politiet kjem mannen og laget han ifrå Oslo.
– Saka er meld og jurist vurderer no kva som skal skje vidare. Vi kjenner identiteten til spelaren, seier Storaker.
Få timar seinare vart mannen pågripen av politiet.
Den 20 år gamle dommaren er ikkje alvorleg skada etter hendinga.
– Slaget har medført hevelse i ansiktet, seier operasjonsleiaren.
Fredrik Fredriksen hos arrangøren fekk ikkje med seg hendinga sjølv, men har snakka med fleire som såg det som skjedde.
Vert utestengd
– Det skjedde etter kampen. Ein spelar gjekk fysisk til angrep på dommaren. Det var ein spelar på laget som tapte finalen som gjekk til angrep. Vi prøvde å stoppe han og fekk etterkvart roa situasjonen, seier han til NRK.
Ifølgje Fredriksen vert spelaren utstengd frå framtidige turneringar.
– Laget hans har lagt seg heilt flate og beklagar det som skjedde. Dei forstår sjølvsagt at det er fullstendig uakseptabelt. Så får vi sjå om det blir aktuelt med noko reaksjon utover at han vert utestengd, seier Fredriksen.
