Det enorme anlegget skal huse blant anna 2,4 kilometer med skiløyper fordelt på tre etasjar, velodrom, skiskyting med laser og BMX-bane. Det heile skal få ein prislapp på 250 millionar kroner.
Blir samanlikna med store sykkelnasjonar
Syklist Andreas Vangstad frå Kristiansand meiner det nye anlegget som potensielt kan glede mang ein idrettsentusiast på Sørlandet er sensasjonelt nytt.
– Det verkar nesten litt for godt til å vere sant. Men viss dette kjem på banen så er det ei kjempestor moglegheit. Vi har ikkje noko tilsvarande i Noreg, så dette ville bety utruleg mykje for både toppidrettsutøvarar og for allmenn bruk, både på Sørlandet og nasjonalt.
Vangstad meiner dette kan ha mykje å seie for talentutvikling, og viser til at mange av idrettsutøvarane frå dei store sykkelnasjonane har bakgrunn frå banesykling.
– Det betyr enormt. Som regel må langrennsutøvarane som er på Sørlandet flytte eller reise langt berre for å få ei helg på ski. Det å kunne satse og busetje seg på Sørlandet vil for både langrennsutøvarar og syklistar vere ein stor fordel.
Til allmenn bruk
Det er Trollvegg Arkitektstudio som står bak planane om anlegget. Det kan i prinsippet plasserast kvar som helst i verda, men arkitektane vil ha det i Kristiansand. Allereie no er dei i forhandlingar om ei tomt nær kommunegrensa til Lillesand.
19. november skal prosjektet presenterast for Kristiansand Næringsforening. Prosjektet som har fått namnet O2-Drome skal vere til allmenn bruk, om det vert realisert.
– Positivt for rekruttering
Tidlegare skiskyttar frå Birkenes, Gunn Margit Andreassen, tykkjer det er særs positivt at anlegget potensielt kan vere ope for alle.
– Det vil ha veldig mykje å seie for rekruttering. At det skal vere ope og ikkje berre retta mot toppidretten gjer at det blir noko som veldig mange vil ha nytte og glede av. Så det ville blitt utruleg gøy viss dette blei lagt til Sørlandet.
Ho likar tanken på at idretten ikkje nødvendigvis treng å vere vær-avhengig.
– Hallen gir unike moglegheiter. Det at ein faktisk kan arrangere større arrangement inne gjer at ein ikkje er så avhengig av værutsikter, og ein kan få snø året rundt. Det blir spanande å sjå når det kjem til kostnadane og kva som faktisk vil vere realistisk å få til.