Fylkesvaraordførar Jon-Olav Strand.
Foto: Svein Sundsdal/NRKEi landslinje ligg ikkje inne i forslaget som vert debattert på Stortinget. Strand kom med meldinga frå talarstolen i fylkestinget.
– Det må vi oppfatte som eit endeleg avslag, seier fylkesvaraordfører Jon Olav Strand (KrF).
Fleirtalet blant fylkespolitikarane i Aust-Agder har allereie signalisert at den vidaregåande skulen i Åmli vert lagt ned dersom det ikkje kjem ei landslinje til bygda.
- Les også: Laget kampanjevideo for å bevare skolen
Blir truleg nedlagt
– Signala eg har fått står fast frå posisjonen si side. Aktiviteten blir lagt ned frå 1. august 2015. No er vi veldig opptekne av konsekvensane dette får for Åmli-samfunnet og ikkje minst for elevane som har starta på si utdanning i Åmli. Vi må sikre at dei får eit kvalitativt tilbod når dei vert flytta til Tvedestrand, seier Strand.
Opposisjonspolitikar Tellef Inge Mørland (Ap) er skuffa og meiner at fylkesvaraordføraren gir seg utan kamp.
– Eg tykkjer det er skuffande at varaordførar Strand gir opp så lett som det her. Det er ingenting som kan kompensere for tapet av ein vidaregåande skule i Åmli. Eg tykkjer også det er synd at ein ikkje har trua på at ein kan drive gode skular ute i distrikta, seier Mørland.
– Ei katastrofe
Fylkesvaraordføraren vil no setje seg ned saman med kommunen for å sjå kva skulelokala kan nyttast til.
– Det kan vere næringsverksemder som treng lokale, eller kanskje kommunen sjølv har behov for å bruke nokre av lokala, seier Strand.
Åmli-ordførar Reidar Saga trur ei nedlegging av skulen vil få store konsekvensar for bygda.
– Det er sjølvsagt ei katastrofe for Åmli. Intet mindre, seier han.
Ordføraren nektar å gi opp håpet om å behalde den vidaregåande skulen. Framtida til skulen skal behandlast i fylketstinget 9. desember.
– Det ser unekteleg svart ut. Men vi gjer ikkje opp før alt håp er ute. Vi klamrar oss til at det kanskje er nokon i fylketinget som tek fornufta fatt, seier han.
