Alle har ein ting til felles: dei elskar handlaga Morgan-bilar.
– Det er ei utruleg kjensle å køyre rundt i ein engelsk klassisk sportsbil i vakkert sommarvêr på Sørlandet. Det er heilt fantastisk, seier Tor Arne Rickvoldsen.
Han er ein av 292 medlemmer i Norsk Morgan Klubb. Frå torsdag til søndag er kring 60 av medlemmene på Morgan-treff på Sørlandet.
På Strømsbu gård i Arendal står fleire titals blankpolerte Morgan-bilar på rekke og rad. Alle er unike - ingen er like.
Ingen bilar er like
– Fargen på bilen min heiter regalraud. Ingen bilar i Norge er like. Fargen kan likne, det kan vere forskjellig trekkfarge inne i bilen. Eg har vore på treff med 2500 bilar og der var det ingen som hadde denne fargen, seier president i klubben, Petter Ellefsen.
Fredag skal Morganklubben mellom anna innom Ugland Bilmuseum i Grimstad.
Også ølsmaking på Nøgne Ø står på programmet, men bilane er hovudårsaka til at 60 Morgan-galne menneske er samla på Sørlandet.
– Vi får gode kontakter og eit triveleg miljø. Det vi har til felles er bilen, seier presidenten.
Og det er ingen vanlege bilar dei har.
Blir lagt merke til
– Det er ein gjeng med godt skolerte handtverkarar som lagar desse bilane i eit lite dalsøkk i England. Karosseriplatene er jo handvalsa og bilen er bygd på ei treramme. Det er ganske spesielt, seier Rickvoldsen.
Skal vi tru presidenten i den norske Morgan-klubben vert bilane lagt merke til. Det er med andre ord ikkje ein bil for deg som ikkje likar å stikke deg fram.
– Du må like å vekke oppsikt. Alle tittar på deg og vinkar på deg. Det er ei oppleving i seg sjølv. Alle blir blide når dei ser oss, smiler Ellefsen.
Dersom du er i Arendal i helga er sjansen stor for at du vil få auge på nokre av bilane. Då skal dei køyre rundt i området og vise fram bilane.