– Nokre spelarar kjem nok til å gå med blikket ned og grue seg, samstundes som dei gler seg til kampen. Ein cupfinale er det største du kan oppleve i norsk handball i år, seier Kurtovic til NRK.
– Alle seier at det er ein vanleg kamp. Det er eg ikkje einig i. For det er ein cupfinale. Det betyr mykje for klubben og byen å få med seg heim ein tittel, seier trenaren.
- Les også: – Bodø er storfavoritt
Held Bodø som favorittar
Verken ØIF Arendal eller Bodø har tidlegare spelt ein cupfinale. Tidlegare denne sesongen har nordlendingane slått arendalittane to gonger.
– Per dags dato er Bodø favorittar nettopp fordi dei har slått oss to gonger og at dei har slått oss ganske klart, seier han.
Kurtovic har tidlegare vore med på å tape ein cupfinale då han var trenar i Drammen. Då var det Elverum som til slutt løfta Kongepokalen.
– Eg lærte mykje av den finalen. Vi var i leiinga gjennom heile kampen og hadde full kontroll. Plutseleg glapp det. Spelarane vart rett og slett redde og skulle «safe» inn. Då tapar du. Det kjem ikkje til å skje mot Bodø, seier han.
– Ein draum
Over 1700 sørlendingar har kjøpt billett til kampen i Oslo Spektrum. Keeper Svenn Erik Medhus gler seg stort til finalen.
– Det er dette vi har drøymt om. Å få med publikum slik at dei vert den åttande spelaren vår. Vi skal vinne kampen på tribuna og forhåpentlegvis på bana, seier Medhus.
ØIF Arendal har gjennomført ein knallsterk første halvdel av årets sesong. I tillegg til plass i cupfinalen toppar laget eliteserien.