– Eg er kjempenervøs. Eg tok fri frå jobben i dag og har eigentleg gått rundt for å få tida til å gå fort, seier Kari Sunde i supportarklubben.
Arendalittane kan sikre sin første cupfinale i historia dersom dei slår Elverum på heimebane onsdag kveld. ØIF slo semifinalemotstandaren i serien tidlegare i haust.
- Les også: Ekspert tror ØIF holder seg i toppen
Har vunne 10 av 11 kampar
– Vi har ein god sjanse til å slå dei. Vi har gjort det før og kan gjere det på nytt. Vi skal iallefall støtte laget så godt vi kan. Det blir nok tårer uansett korleis det går, smiler Sunde.
Eliteserieklubben frå Arendal har overraska og imponert dei aller fleste så langt denne sesongen. Klubben har vunne 10 av 11 obligatoriske kampar. Tapet kom i første serierunde borte mot Bodø.
Sigersrekka gjer at ØIF Arendal toppar eliteserietabellen for første gang. I tillegg er dei altså i semifinalen i cupen.
– Det blir heilt vilt om vi klarer dette. Det kjem til å bli ville jubelscener på tribunane, seier supportaren.
Kampen er utselt
Onsdagens semifinale er heilt utselt. Det betyr over 2500 tilskodarar inne i hallen.
– I tillegg har vi sett opp ein storskjerm i auditoriet på skulen like ved hallen. Der sender vi inn alle som ikkje får plass inne i hallen, seier sportsleg leiar i ØIF, Per Carsten Michelsen.
Det blir også mange tilreisande supportarar frå Elverum. Ein sponsor har betalt 15 000 kroner for at flest mogleg skulle få sjansen til å støtte opp om laget sitt.
– Vi har god kontroll. No gler vi oss veldig til at kampen skal komme i gang, seier Michelsen.
Elverum har spelt cupfinale fem gonger. To gonger har dei gått til topps.