– Han er sikta for drapet i samband med hendinga og sit i arresten i Kristiansand. Han sit i avhøyr no, seier lensmann i Valle, Dag Hovden til NRK.
Det var klokka 03.47 natt til søndag at politiet fekk melding om at ein 50 år gammal mann hadde blitt knivstukken i Valle i Aust-Agder.
Mannen er frå Valle og vert beskrive som ein godt kjend person i bygda.
50-åringen vart send rett til Ullevål sjukehus i Oslo med luftambulanse. Klokka 07.20 stadfesta sjukehuset at han døydde av skadane.
Fire knivstikk
Mannen skal ha blitt påført tre knivstikk i ryggen og eitt i brystet.
– Det vart først meldt ifrå om at ein person var slått ned og trengde hjelp. Seinare vart dette justert til at han var knivstukken, seier lensmannen.
– Ambulansepersonell gav førstehjelp på staden og tok han med seg og overlét han til luftambulansen som reiste rett til Oslo, seier Hovden.
– Mannen var ved medvit da han vart overlaten til ambulansepersonellet, legg han til.
Episoden skjedde i samband med ein privat samkome der dei to personane kom i klammeri med kvarandre. Drapet skal ha skjedd i eit partytelt.
– Ingenting tyder på nær relasjon mellom dei to. Om dei var kjenningar eller kor godt kjenningar dei var, veit vi førebels lite om, seier han.
Ikkje full oversikt
Ved 11.30-tida søndag dreiv politiet framleis undersøking på åstaden. Det skal ha vore fleire personar på samkomet, men dei fleste hadde reist då drapet skjedde.
– Det var fleire personar i området som har meldt ifrå. Vi har ikkje full oversikt over hendingsgangen og posisjonen til dei ulike personane per no, seier lensmannen.
– Vi jobbar med å avhøyre personar som var i området, som var til stades på festen. Vi avhøyrer også gjerningspersonen og gjer tekniske undersøkingar, seier han.