Normalt har ein fotballkamp som kjent 15 minutt pause. I dette tilfellet blir det altså ein pause på 20 055 minutt.
Kvalifiseringskampen vart stoppa etter første omgang laurdag på grunn av elendige speleforhold. Jerv leia 1-0 då kampen vart stoppa. Resultatet vert ståande.
Dommar Kristoffer Hagenes stoppa kvalifiseringskampen mellom Jerv og Grimstad etter pause laurdag.
Foto: Sander Heggheim/NRKKraftig regn førte til overvann på bana, som gjorde det nærast umogleg å spele fotball.
Kraftig vind gjorde forholda endå verre for spelarane. Røde Kors og ambulansepersonell måtte blant anna hjelpe Amahl Pellegrino, som vart kraftig nedkjølt.
Uvisst kvar kampen blir spelt
Det er framleis ikkje klart kvar kampen skal spelast, men Jerv håpar at Levermyr stadion skal vere klar til andre omgangen.
Måndag ser det særs lite aktuelt ut. Bana er dekka med 7–8 centimeter snø på ein stadion utan undervarme.
– Får vi varme dagar, er det realistisk å spele her. Vi har vore i kontakt med Norges fremste grasekspertar som seier vatnet til forsvinne. Vi vil strekke oss ufatteleg langt for å få til det, men går det ikkje ynskjer vi å bruke Sparebanken Sør Arena, seier styreleiar i Jerv, Per Gunnar Topland.
Dersom Levermyr ikkje blir klar vil kampen truleg gå på Sør Arena i Kristiansand.
Speleforholda var elendige under kvalifiseringskampen mellom Jerv og Mjøndalen laurdag.
Foto: Sander Heggheim/NRKStabæk kan måtte vente ein månad
Vinnaren mellom Jerv og Mjøndalen skal møte Kongsvinger i den siste kvalifiseringskampen mellom 1. divisjonslaga.
Vinnaren av denne kampen skal møte Stabæk over to kampar der det blir avgjort kven som spelar i eliteserien neste sesong. Stabæk kan altså måtte vente i ein månad.
– Klart det ikkje er ideelt. Vi som har ligge under streken i det siste må sjå på dette som ein ny moglegheit, men eg syns det blir litt feil at eliteserielaget blir skadelidande, seier sportssjef i Stabæk Inge André Olsen til NRK.
– Ein skal kanskje ikkje ha ein fordel om ein kjem frå toppdivisjonen, men no får dei andre laga spele viktige kampar medan vi går for lut og kaldt vatn, seier han.
Stabæk har booka ein treningskamp mot Strømmen i neste veke for å halde forma ved like.
