– Det er ein trist og ubegripeleg trend, seier sjef for Tryg Forsikring i Noreg, Espen Opedal.
Årleg vert over 100 livbøyer fjerna lang kysten, kjem det fram i ei pressemelding frå forsikringsselskapet.
Det kan koste liv, seier Opedal.
– Vi håper folk skjøner at livbøyene er der for å redde liv. Ei bøye som manglar kan fort vere forskjellen mellom liv og drukningsdød.
Har sørga for over 1000 redningar
Sidan livbøyene kom i 1952 har det blitt plassert ut 40 000 livbøyer langs kyst og vatn. Desse har sørga for rundt 1000 redningar over heile landet.
Skjærgårdstjenesten i Risør er nokon av dei som opplever at folk ikkje kan la bøyene henge i fred.
– Det er diverre slik at vi kjem til tomme stativ, seier Yngve Hansen i Risør kommune.
– Dei stel taua eller så tek dei heile bøyen. Det ser ut til at anten så har dei glede av å fjerne dei, eller så tek dei det til eige bruk.
Dei siste åra har eit titals bøyer forsvunne frå Risør.
– Eg tykkjer det er veldig dumt, dei er trass alt hengt ut for at dei skal redde menneske viss det skjer noko, seier Hansen.
– Trur ikkje folk forstår kor viktige dei er
Under turistsesongen forsvinn bøyene. Kvart år må Tryg Forsikring sende ut over 100 nye livbøyer etter hærverk eller tjuveri over heile landet.
I Arendal har det også forsvunne fleire bøyer, men der har ei av bøyene fått montert på ein GPS-sendar.
Hansen skulle ønskje alle kunne forstå viktigheita av dei.
– Eg trur ikkje dei er heilt klar over kor viktige dei er. Dei skal jo vere her for å redde liv.
Tryg forsikring opplyser om at viss ein finn eit tomt livbøyestativ kan ein kontakte anten kommunen eller leiinga i den aktuelle båtforeininga.
- Les også: