Vrakar Okine - held fram spelarjakta

– Okine har veldig mykje bra med seg, men det er ting vi er usikre på, og difor legg vi ballen død no, seier sportssjef Håvard Flo til NRK.no.

Midtstopparen var innom Sogndal også sist sommar, og fekk no med seg nye 14 dagar med prøvespel i klubben. Likevel vart det altså ingen kontrakt på ghanesaren.

• Les også: Kan bli eit raskt OK for Okine i Sogndal

Har tysk keeper på prøvespel denne veka

No jobbar Sogndal vidare i jakta på forsterkinga. Klubben er ute etter ein keeper, ein kantspelar og ein midtstoppar.

Sist veke var målvaktene Andreas Leitner og Jacob Storevik på prøvespel, men førebels er det ikkje teke noko avgjerd om ein av desse blir ny keeper i klubben.

– Vi har ein ny keeper her denne veka, og det skal bli artig å sjå han i aksjon. Men uansett vil vi nok bruke litt tid på å teste ut litt framover, seier Håvard Flo.

Han siktar til tyske Fabian Spiess, som til dagleg spelar på utlån i Bristol Rovers i England. 20-åringen er Notts County sin eigedom, men har vore på utlån i fleire klubbar siste åra.

• Les også: Spissar er det einaste Bakke ikkje treng

Ventar med å bestemme seg for lokale spelarar

Sogndal ser denne veka også nærare på Tor André Skimmeland Aasheim frå FK Haugesund. Den offensive midtbanespelaren debuterte i eliteserien i 2014.

– Det skal bli artig å sjå kva han er god for. Han er ein bakromsspelar, ein hurtig kant, som også kan spele på begge sider. Han er dessutan inventar på U-landslag, seier Håvard Flo.

Sogndal har førebels ikkje teke endeleg stilling til om dei vil hente dei lokale talenta Simen Lefdal, Edin Øy, Erling Myklebust eller Vegard Savland.

– Det er definitivt interessante spelarar. Men vi er førebels i ein kartleggingsfase, så får vi sjå etterkvart kva avgjerd vi tek – men det er klart at dei har vist seg frå ei fin side, seier Flo.

• Les også: Slik jobbar Bakke og Sogndal med fylkesprofilen
• Les også: Blir med Sogndal vidare trass nedrykket – men ønskjer seg til tysk storklubb