Etter ein medisinsk test måndag morgon, signerte Eirik Birkelund kontrakten som gjer han til Sogndal-spelar ut 2018-sesongen. Så gjennomførte han si første trening med klubben.
21-åringen fekk ikkje forlenga kontrakt med Brann og kjem gratis til Fosshaugane.
– Med kulturen, fasilitetane, treningsopplegget og måten å spele fotball på, så skulle det spesielle ting til, for at det skulle bli andre enn Sogndal, seier Birkelund.
Sa nei til Viking
For i tillegg til eit koppel av 1. divisjonsklubbar, viste også Kjell Jonevret og Viking interesse for den kontraktlause bergensaren. Det vart med eit treningsopphald i førre veke.
For berre nokre få dagar sidan la Sogndal eit kontraktsforslag på bordet.
– Viking ville sjå han att i fleire fotballøkter denne veka, men interessa frå Eirik Bakke var krystallklar, seier Henning Berg, som har vore Birkelund sin agent og rådgjevar sidan 2012.
Kjenner kvarandre
Sogndal-trenaren og nyervervinga kjenner til kvarandre frå tida der Bakke var Brann-spelar og Birkelund Brann-talent.
EKSTREM: Rådgjevaren til Eirik Birkelund (bildet), Henning Berg, meiner Sogndal har fått ein uslipa diamant i stallen. – Eirik kan opne spelet med harde og presise pasningar, og er ein god avsluttar, seier Berg.
Foto: NRK21-åringen blir skildra som ein teknisk og spennande spelar, som passar godt inn i spelargruppa. I første omgang må han konkurrere mot Babacar Sarr og Rune Bolseth.
– Eg kan spele i dei fleste posisjonar sentralt på midtbana. Er hardtarbeidande boks til boks, er spelande, men også veldig glad i å ha ballen i beina, skildrar Birkelund seg sjølv.
Ekstreme kvalitetar
Rådgjevar Berg har tidlegare vore kritisk til at Birkelund ikkje har fått speletid i Brann. Han meiner Bakke no har fått i nevane ein uslipa diamant.
Berg viser mellom anna til eit oksygenopptak på mellom 75 og 80. Snittet i eliteserien er på kring 65.
– Eirik har ekstrem fysikk, ekstrem teknikk og ekstrem fart. Han er intelligent og i stand til å spele fotball i høgt tempo, seier rådgjevaren og viser til den tidlegare engelske landslagsspelaren.
«Blond djevel»
Birkelund var 18 månader i franske St. Etienne, der treningskvardagen var med A-laget.
Kamptreninga til han av personlege årsaker reiste heim til Bergen, fekk han som kaptein for reservelaget.
- Les også: Brann hentar talent frå St. Etienne
– Eirik vart kalla «den blonde djevelen», nettopp på grunn av dei ekstreme kvalitetane. I Bergen vart han plassert i skapet. Med speletid så tvilar eg ikkje på at Sogndal har ein A-landslagsspelar i han på relativt kort tid, seier Berg.
Spennande sesong
Birkelund, som fyller 22 år om få dagar, drøymer framleis om å bli utanlandsproff. Førebels er det speletid i trygge omgjevnader som betyr mest.
I Sogndal skal Birkelund kombinere fotball med studiar ved Høgskulen.
– Alle fotballspelarar har eit mål om utlandet, men akkurat no er all fokus på jobben eg skal gjere her i Sogndal. Og her ser eg berre fleire moglegheiter som opnar seg.
– Kva tenkjer du om sesongen?
– Sogndal gjorde ein veldig solid sesong i fjor, og slik opplegget er rundt trening og kamp, så trur eg det kan bli ein spennande sesong.
