NRK Meny
Normal

Viste støtte til gruveaksjonistane

FØRDE (NRK): Rundt hundre personar gjekk onsdag kveld i fakkeltog frå Førde rådhus for å vise støtte til gruveaksjonistane.

Ein liten gut står med fakkel i handa

STØTTEERKLÆRING: Både unge og gamle hadde møtt fram for å støtte aksjonistane onsdag kveld.

Foto: Josef Benoni Ness Tveit / NRK

Oddvar Torsheim

STIPEND: Oddvar Torsheim meiner aksjonistane burde få stipend, ikkje bøter.

Foto: Josef Benoni Ness Tveit / NRK

Onsdag kveld gjekk rundt hundre personar i fakkeltog gjennom Førde sentrum for å støtte demonstrantane.

Ein av dei som hadde møtt fram på fakkeltoget i Førde for å gi si støtte til demonstrantane var kunstnar Oddvar Torsheim. Han synest det er urimeleg dersom aksjonistane må betale.

– Dei har då ikkje drepe nokon, har dei det? Eg synest det er visse ting i dag som ein godt kan protestere mot, sjølv om eg drar på åra. Dei burde få stipend, ikkje bøter.

Onsdag la aktor fram påstand om 24 000 kroner i bot eller subsidiært 48 dagar i fengsel til ti av aksjonistane som har nekta å betale bota si etter demonstrasjonane mot fjorddeponiet i Førdefjorden.

Til saman har 70 av dei 86 demonstrantane som vart bøtelagd for sivil ulydnad nekta å betale bøtene og må møte i retten.

Rundt 100 personar deltok onsdag kveld i eit fakkeltog for å støtte gruveaksjonistane i Førde.

– Nødvendig

Helge Schei

SYND: Helge Schei synest det er synd dersom dei som forsøker å kjempe for naturen blir dømde for det.

Foto: Josef Benoni Ness Tveit / NRK

Rettssaka som tok til tysdag er den første av fleire rettssaker etter demonstrasjonane. Bystyrerepresentant for Førde SV, Helge Schei, synest det er synd dersom aksjonistane blir dømde.

– Ein rein fjord er eksistensielt for alle vi som bur her. Eg synest det er synd dersom dei som prøver å verne naturen blir dømde for det. Av og til kan sivil ulydnad vere nødvendig.

– Angrar ikkje

Ingrid Skjoldvær t.v. er med på å opne fakkeltoget

Ingrid Skjoldvær t.v. og Anne-Line Thingnes Førsund opnar fakkeltoget.

Foto: Josef Benoni Ness Tveit / NRK

Leiar i Natur og Ungdom, Ingrid Skjoldvær, er ei av dei som har vore på tiltalebenken denne veka. Ho synest det var fint å sjå fakkeltoget onsdag kveld, og trass stor bot angrar ho ikkje på at ho var med på aksjonen.

– Vi har ei liste på 2000 namn som har sagt seg villig til å vere sivilt ulydige. Sjølv med så store bøter trur eg mange av dei er villige til å vere med, men det er nok og dei som vil vegre seg. Det er synd, vi har brukt mykje tid til å påverke dette lovleg.

– Rørande

Gjertrud Øvretveit

I RETTEN: Gjertrud Øvretveit er ei av dei som står på tiltalebenken i rettssaka som tok til tysdag.

Foto: Josef Benoni Ness Tveit / NRK

Gjertrud Øvretveit frå Sande i Gaular står og på tiltalebenken i rettssaka som tok til tysdag. Ho synest støtta demonstrantane fekk onsdag var rørande.

– Det beste med å vere med på aksjonen og rettssaka er den massive støtta vi har fått. Eg synest det er rørande at så mange møtte opp i dag.

– Ikkje tapt

Sjølv dersom rettssaka endar med fellande dom mot demonstrantane, seier Silje Ask Lundberg som er leiar i Naturvernforbundet, at kampen ikkje er over.

– Det viktige her er ikkje storleiken på bøtene eller om dei blir ståande, det er å sette søkelys på miljøkriminaliteten som vil gå føre seg. Vi har framleis ikkje tapt kampen.

Fakkeltog var det og i Oslo, der mellom andre stortingsrepresentant for Venstre Sveinung Rotevatn, og stortingsrepresentant for SV Heikki Holmås stod på lista over appellantar.

Ein liten gut står med fakkel i handa
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.