- Sjukehus i Nordfjord og Volda bør bli til «Fjordane sjukehus»

Etter at det har blitt bestemt at Nordfjord sjukehus misser fleire tilbod er det løyvd 75 millionar kroner over tre år til å arbeide med omstilling av sjukehuset.

Helsefaggruppa som jobbar med prosjektet ”Framtidas lokalsjukehus” har no sendt vidare det konkret innspelet om «Fjordane sjukehus» til departementet, skriv avisa Firda.

• LES OGSÅ: Gir nedleggingsprosess totalslakt

Vil skape storleik og stabilitet

Helsefaggruppa har som føresetnad at lokalsjukehuset framleis er eit reelt sjukehus, og at kirurgisk verksemd med døgnkompetanse innan kirurgi og anestesiologi framleis eksisterer. Dei legg og til grunn eit omfang som gir eit robust teneste- og fagmiljø, skriv avisa.

For å sikre eit robust og framtidsretta lokalsjukehus for framtida bør prosjektet også omfatte Volda sjukehus, meiner Helsefaggruppa. På den måten vil sjukehuset tene 70 000 personar.

Firda skriv at Helsefaggruppa meiner dette vil gje både storleik og stabilitet, og grunnlag for eit mangfald av spesialpoliklinikkar.

• LES OGSÅ: Trur anestesien kan opne for ny aktivitet ved Nordfjord sjukehus
• LES OGSÅ: Lege melder HF-toppane til Helsetilsynet

Tre hovudretningar

Helsefaggruppa ser for seg tre hovudretningar ved «Fjordane sjukehus». Det er utvikling av Nasjonal Kikhol-ortopedisk Akademi for artroskopisk kirurgi. At sjukehuset skal bli eit forsøksområde for eit nytt vidareutdanningssystem for allmennlegar.

I tillegg vil Helsefaggruppa ifølgje avisa Firda at sjukehuset skal ha samhandling i tenester om aktuelle pasientar mellom allmennlegar og spesialistar ved hjelp av ei overføring av foto/film, tekst og TV-overføring.

Leiar for helsefaggruppa, Bengt Georén seier til avisa at dei no ventar på svar om at innspelet er motteke.

- Det vi håpar, og som kan skje, er at departementet gir Helse Vest signal om at det vi har komme med er eit prosjekt som er verd å sjå nærare på.