– Vi må inn på veldig store kutt når vi skal spare 230 millionar. Men at vi klarar å ha eit levande lokaldemokrati, eit folkestyre, er likevel viktig, seier Jenny Følling.
Med kutt på 230 millionar kroner er det mange fylkeskommunale tilbod som står i fare. Men det nest største partiet i fylket, Senterpartiet, er allereie klar på at noko skal skjermast. Nemleg pengane som går til dei sjølve, som partistøtte.
- LES OGSÅ: Slik vil kutta råke deg
– Pengane går til folkestyret
– Vi har gjeve signal om at partistøtta ikkje er det første vi skal gå laus på. Vi lyt sjå på kvar vi skal ta pengar, men å sikre eit lokaldemokrati i eit folkevald organ er viktig, seier Følling.
– Du er ikkje redd for ei uheldig signaleffekt om at det fyrste du seier er at de vil skjerme er pengane som går til dykk sjølve – til partia?
– Pengane går til politisk aktivitet, til folkestyret, til at dei som vert valde skal kunne gjere ein jobb, og til at ein skal forankre arbeidet lokalt. Visst ikkje ein skal ha det treng ein ikkje noko folkevald organ. Ein må ha parti som fungerer.
- LES OGSÅ: Fleire skular kan ryke
- LES OGSÅ: Fjellovergangar kan bli vinterstengde og båtruter kutta
– Politikarane må gå føre
– Det er eg heilt ueinig i. Her skal vi ikkje skjerme nokon ting, er svaret frå Frank Willy Djuvik, fylkesgruppeleiar for Framstegspartiet.
Han er villig til å ofre den årlege støtta på om lag 4,4 millionar kroner.
– Det blir tungt for partia å gjennomføre kutt i eigne rekkjer. Men det vert akkurat det same for fylkeskommunen: det er ikkje enkelt å kutte ti prosent. Politikarane må gå føre og vise at vi er villige til å vere med på kutta, seier Djuvik.
Men Følling meiner at partistøtta vernar folkestyret.
– Demokratiet er berande i landet, både i kommunepolitikken, i fylkeskommunal politikk og i nasjonalforsamlinga. Difor må vi verne om folkestyret, seier Følling.
Eit utval samansett av alle fylkesgruppeleiarane skal vurdere kutt i partistøtte før neste fylkesting.