Meiner også sauer, kyr og geiter må ha refleks når dei går langs vegane

Både Trygg Trafikk, dyrevernet og Bonde- og småbrukarlaget i Sogn og Fjordane stiller seg bak det noko uvanlege forslaget.

Søndag vart 33 geiter drepne då nattbussen frå Oslo køyrde rett inn i ein geiteflokk som kvilte i vegbana i Kjøsnesfjorden.

– Hadde eg hatt krøtter langs vegen, så ville eg sett veldig alvorleg på det og sikra dei, seier fylkesleiar Audun Heggestad i Trygg Trafikk.

Kan berge liv

Fleire stader i Sogn og Fjordane er både sauer, geiter og kyr eit vanleg syn både ved og i vegbana. Gjerde og undergang er mellom tiltaka som har vore nemnde. Heggestad meiner det er bilførarane som til slutt sit med ansvaret, men seier refleks på dyra kan berge dyreliv.

• LES OGSÅ: – Vanskeleg samarbeid med bøndene
• LES OGSÅ: NAF vil slakte buskapen langs vegane

– Jo større dyra er, dess viktigare er det i høve til følgjene også for dei som køyrer på. Uansett skal ein ikkje køyre på dyr som er på eller ved vegen, seier han.

(Artikkelen held fram under TV-saka)

Lettare å sjå

Med tanke på uhell og ulukker på mørke kveldar og nattetid, kan slike refleks vere førebyggjande.

Martin Braanaas Kleppe i Bonde- og småbrukarlaget tykkjer framlegget om refleks på dyr både er humoristisk og veldig godt.

– Det er mange måtar å løyse det på. Ein kan ha det i kombinasjon med bjøller, øyremerke eller på beina til dyra. Men eg trur utan tvil at dersom det er dyr i vegbana og det er mørkt, så er det mykje lettare å sjå dyra med refleks, seier han.

Enkelt og effektivt

Leiar av Dyrebeskyttelsen i Norge, Ove Myrmel, meiner refleks på dyra er enkelt og effektivt.

Han trur også at refleks på husdyr kan vere med på å redde liv.

• LES OGSÅ: – Staten må hindre dyretragedier

– Alle dyr må uansett merkast i dag. Det er som regel ein merkelapp i øyret og desse kan produsentane utstyre med refleks. Då har ein slått to floger i ein smekk. Både merking og refleks i same brikke, seier han.