– Vi meiner dette vil forsterke opplevingsverdien av verdsarvfjorden på haust, vinter og vår, seier Per Svanes. Han er koordinator for eit nytt prosjekt i Nærøyfjorden.
Kvar dag gjennom vinteren går turistbåten «Vision of The Fjords» gjennom Nærøyfjorden. Men det er ikkje så mykje turistane får sjå av verdsarvfjorden, når dei tek båten i mørkeret på vinterstid.
Dette vil The Fjords som driftar båten gjere noko med. Saman med Flåm AS og Nærøyfjorden Verdsarvpark søkjer dei no om finansiering og løyve til å lyse opp utvalde område av fjorden.
– Vi trur dette vil gjere Nærøyfjorden meir attraktiv på vinterstid og få fleire turistar hit. Dette vil vere med å auke belegget på overnattingsstader og spisestader, seier Svanes.
Ønskjer ideen velkomen
– Eg trur det kjem til å bli ein attraksjon. Sjølv vil eg gå ned på kaia og kikke på. Det blir veldig kjekt, seier Arild Dyrdal.
Dyrdal er ein av få fastbuande i Nærøyfjorden. Her er han omgitt av 1000 meter høge fjell og på ein overskya vinterdag kan det bli veldig mørkt i fjorden. Dyrdal håpar at ideen vil bli realisert.
– Eg trur ikkje det vil vere mange motførestillingar mot dette. Det er jo vanleg å lyse opp kyrkjer og skibakkar.
– Heilt utruleg
Dee Cunningham bur også i Nærøyfjorden. Han er ikkje like positiv til prosjektet.
– Eg tykkjer det er heilt utruleg. Skal dei ta ein av dei få plassane som faktisk er mørke og setje opp lys der også.
Cunningham meiner det er viktig å avgrense turismen i verdsarvområdet, slik at naturen ikkje tek skade.
– Ein ser kva som skjer om ein ikkje tek omsyn til naturen. Eg har vore i mange verdsarvområde som er overkøyrt av dei som vil tene pengar på det, dit vil eg ikkje reise tilbake.
Lyskastarar på land eller vann
Korleis dette skal løysast teknisk er endå ikkje klart. Svanes seier at dei vurderar to ulike løysingar, enten å ha lyskastarar på båten eller på land.
– Lyset skal styrast frå båten, der vil det vere ein av-og-på-knapp. Lyset skal berre vere på når båten går forbi, forklarar han.
Prosjektgruppa ønskjer i første omgang å lyse opp to punkt i Nærøyfjorden og teste desse ut på turistar neste vintersesong. Om dette blir ein realitet er det opp til styret for verneområdet å avgjere.
– Vi er avhengige av å ha med oss grunneigarar og forvaltningsmyndigheiter. Er dei positive til det, så trur eg ikkje det vil vere så mange innvendingar, seier Svanes.
Dersom forprosjektet er vellukka, er målet å få 15 slike opplyste punkt i Nærøyfjorden og Aurlandsfjorden.