Kraftkommunar vil ikkje lenger sponse andre med millionar - vil ha pengar tilbake

I fjor tente fylkeskommunen 75 millionar kroner frå overskotskrafta til 5 kommunar her i fylket. Ordførar Marta Finden Halset (Ap) i Vik meiner desse pengane burde vore øyremerka distriktet dei kjem frå.

– Desse kommunane som har betalt med store naturinngrep, dei bidreg med store ressursar til storsamfunnet. Det er ikkje meir enn rett og rimeleg at vi skal få tilbakebetalt noko frå storsamfunnet.

• LES OGSÅ: Kraftkommunar fryktar kommunesamanslåing - vil helst halde på pengane sjølve

Vil at pengane skal komme alle til gode

Ordføraren i Vik er lei av at fylket hentar ut store inntekter samstundes som fylkeskommunen knapt har aktivitet i bygda. I fjor tente fylket 75 millionar på såkalla overskotskraft frå fem kommunar. Årsaka er at Bremanger, Vik, Aurland, Luster og Lærdal ikkje får alle konsesjonskraftinntektene sjølve på grunn av få innbyggarar.

I Hordaland har der i mot slike inntekter gått til utvikling i den regionen dei kjem frå. Det førte mellom anna til pengar til Hardangerbrua. Men fylkesordførar i Sogn og Fjordane, Åshild Kjelsnes frå Ap, er ikkje interessert i å gjere det same.

– I Sogn og Fjordane har det vore ein anerkjent politikk i mange år at dei midlane som fylkeskommune har rett til å ta ut, skal komme heile fylket til gode, seier Kjelsnes.

• LES OGSÅ: Fylkeskommunen kan tape millionar om kraftkommunar sler seg saman

– Det er mange som skor seg

Men trass skepsisen til fylkesordføraren, også Høgre-ordførar i Aurland, Noralv Distad, ynskjer at fylkeskommunen skal føre pengane tilbake til regionen.

– Det er mange som skor seg godt på kraftutbygging i Aurland. Det som ligg att i kommunen, er i høgste grad rettkomme. Det er kommunar med lite fylkeskommunale aktivitetar, så eg tykkjer det er noko som bør vurderast. For å få gjort noko med det, må vi ha fleirtal i fylkestinget, seier han.

Men fylkesordførar Åshild Kjelsnes avviser framlegget. Ho meiner fylkeskommunen har rett til å bruke pengane som dei vil.