- Tida er ikkje moden for å sette i gang ein prosess for samanslåing av kommunane i Indre Sunnfjord, seier Gaular-ordførar Jenny Følling.
- LES OGSÅ:
- Trur det er stor usemje om saka
Følling meiner det er bra at dei politiske partia diskuterer tema, men ho vil ikkje sette saka på den kommunale dagsorden enno.
- Den saka er noko umoden enno. At partia diskuterer det er greitt. Men eg kjem ikkje til å setje den på dagsorden no. Vi må sjå kva som skjer med samhandlingsreforma og eg trur også at folk er usamde om kommunesamanslåing eller ikkje, seier Følling.
Vil ha saka i valkampen
Lokallagsleiar Turid Håheim Hestad i Gaular Senterparti meiner at kommunesamanslåing bør komme på den politiske dagsorden igjen og gjerne bli eit tema i valkampen.
Hestad får støtte frå lokallagsleiar Jan Herstad i Naustdal.
Kommunane rundt Førde avviste samanslåing ved ei folkerøysting i 2003.
Herstad understrekar at ein må ha innbyggjarane med seg, men han meiner omsynet til å utvikle Førde som sterkt regionsenter må vere ein viktig del av debatten.
Vil ikkje ta i saka no
Men Følling står på sitt. Ho trur ein debatt om kommunesamanslåing no vil splitte.
- Det vi treng er å samle. Og vi treng å ha eit godt samarbeid i Sunnfjord. Det har vi hatt dei siste åra, og vi har fått til utruleg mykje.
Jølster er den tredje kommunen som naturleg høyrer med når ein tenkjer eit stor-Førde, men senterpartiordførar Gerd Dvergsdal seier saka ikkje er på dagsorden der.
Heller ikkje gruppeleiar for Jølster Arbeidarparti Atle Reidar Sandnes, vil ha saka på dagsorden no.
- Det vil ta tid
Følling er overtydd om at ei eventuell samanslåing av kommunar vil ta tid.
- Gjennom samarbeid kan eit tettare samarbeid mellom kommunane vekse fram. Men eg trur det vil ta tid, seier ordføraren i Gaular.