Han vil ikkje ha fiskefôret med giftstoff i merdane til Marine Harvest

100.000 tonn med fiskefôr som inneheld fiskemjøl med for høge verdiar av giftstoffet Heksaklorbenzen (HCB), har alt blitt gitt til norsk laks.

Fôrindustrien ynskjer å bruke endå 1000 tonn til som ligg att i karantene og har klaga på Mattilsynet sitt vedtak, og bedt om dispensasjon frå regelverket.

• LES OGSÅ: Reagerer sterkt på gift i fiskeforet

Men kommunikasjonssjef Ola Helge Hjetland seier Marine Harvest ikkje vil ha fôret uansett.

– Dette er ei alvorleg sak. Uansett kva Mattilsynet kjem fram til er det heilt uaktuelt for oss å kjøpe dette fôret og bruke det i vår produksjon.

Vil selje restlageret

Det var i sommar det vart påvist at fiskemjøl frå Peru som blir brukt i norsk oppdrettsfôr hadde for høge verdiar av miljøgifta Heksaklorbenzen (HCB).

Over 100 000 tonn med ferdig fôrvare hadde då alt blitt brukt som mat til oppdrettslaks. Vel 1000 tonn som er igjen av fôret hjå tre norske fôrprodusentar er sett i karantene av Mattilsynet.

Men produsentane ynskjer likevel å omsette fôret, og har gjennom felles advokat klaga Mattilsynet si avgjerd og bede om dispensasjon. Argumentet er at det ferdig utblanda fôret samla sett kjem under grenseverdiane. Dermed utgjer ikkje fòret nokon helsefare for folk.

– Handlar om tiltru

Men Marine Harvest seier dei uansett ikkje vil ha det omstridde fôret.

– Fôret utgjer ikkje nokon fare for helsa til forbrukarane, men for oss handlar det om tiltrua til oss som matprodusent og tiltrua til våre produkt. Dette er òg bakgrunnen for at i år har starta opp å reinse all fiskeolje i fôret vi produserer sjølve for miljøgifter. Etter grenseverdiane er det trygt, men marknaden er opptekne av problemstillinga.

Hjetland reknar med at fôr som ikkje skulle vore omsett, også har hamna i Marine Harvest sine anlegg. Selskapet understrekar at prøver av fisken ikkje viser nokon helsefare.

Selskapet har nyleg starta eigen fôrfabrikk og annonserte i vår at dei vil reinse all fiskeolje i fôret for ulike framandstoff. Bakgrunnen er uro i marknaden nettopp for miljøgifter i fisken.

– Trygt å bruke

Administrerande direktør Erlend Sødal i fiskefôrselskapet Skretting seier dei tek Marine Harvest si avgjerd til etterretning. Men han understrekar at både Mattilsynet og bransjen sjølv meiner at gifttabben ikkje utgjer nokon fare for folkehelsa.

– Vi skal tene kundane våre på best vis. Fôret er heilt trygt å bruke, men samstundes forstår eg våre kundar som er urolege for renomméet ute i marknaden.