Vil ha fire AMK-sentralar som i dag

– Vi ser heilt klart fordelen med å vere lokale og tett på. Det er i alle fall argument som må takast med i vurdering som skal gjerast politisk, seier Helge Robert Midtbø som er direktør for kirurgisk avdeling i Helse Førde

Midtbø har så vidt fått høyre om dei nye tankane om å flytte sentralane.

Samlokalisering

For i justisdepartementet er det eit mål i seg sjølv å samle AMK-sentralen med brann- og politi. Det kan bety at alt blir flytta til Bergen.

• LES OGSÅ: Departementet stadfester: AMK-sentralane kan bli flytta

– Poenget er at ein ynskjer i størst mogleg grad å få til ei samlokalisering, for på den måten å få størst mogleg effekt ut av større einingar, seier statssekretær Hans J. Røsjorde for Frp i justisdepartementet.

I avtalen mellom Venstre og regjeringspartia om politireform står det:

"Brann- og redningsetatens nødmeldesentraler skal samlokaliseres med politiets operasjonssentraler. De nye sentralane skal klargjøres slik at Helsevesenets AMK-sentraler også kan plasseres på samme sted. "

• LES OGSÅ: – Kan ikkje anna enn å akseptere flytting av AMK

Ingen tvang

Tysdag ettermiddag kjem det ein slags kontrabeskjed frå helsedepartementet. Statssekretær Anne Grethe Erlandsen for Høgre seier det er frivillig å slå seg saman.

– Her er det ingen tvang. Det som er viktig er at nokre stader har dei prøvd ut dette og har gode erfaringar, men det vil vere avhengig av lokale forhold og det må vi ha respekt for

Det er Helsedirektoratet som skal greie ut det. Og til slutt er det dei regionale helseføretaka saman med lokal brann- og politileiing og lokale styresmakter som skal avgjere om dei vil samle seg.

Virtuelle AMK-sentralar

I Helse Vest er det ingen planar å sentralisere AMK-sentralane.

– Vi meiner vi har best nytte av å ha AMK-sentralane i dei fire helseføretaka våre. Det vil seie i Stavanger, Haugesund, Bergen og Førde, seier Herlof Nilsen som er administrerande direktør i Helse Vest.

Han seier dei no jobbar med ei virtuell løysing som gjer at dei kan fire AMK-sentralar som i dag, men som ved behov kan koplast saman til ein via dataliner.

– Dermed får vi effekten av å ha ein stor sentral, samstundes som vi beheld fire lokale AMK-sentralar med god lokalkunnskap.