Ap vil gi studentane stipend i ein ekstra månad

I dag får studentar stipend i ti månader – frå august til mai. Då kan det fort bli tomt i lommene den siste månaden av studietida, seier fungerande fylkesleiar i AUF, Ole André Aarvoll.

– I nokon tilfelle har det vore slik at studentane har måtte be foreldra om støtte den siste månaden, seier Aarvoll.

• LES OGSÅ: Fleire studentar arbeider ved sida av studiane

Samrøystes vedtak

Det var AUF som fremja forslaget om at studentar skal få stipend i 11 månader på årsmøtet til Sogn og Fjordane Arbeiderparti, som var i helga. Eit samrøystes årsmøte var einige om at dette var noko dei ville støtta.

– Ein kjempesiger for AUF i Sogn og Fjordane, og ein kjempesiger for studentar som no får stipend i alle dei månadene dei studerer, seier Aarvoll.

• LES OGSÅ: Studentene om Arbeiderpartiet: <br/>– Resirkulering av brutte løfter

Aarvoll meiner dette vil føre til ei betre studietid.

– Det vil bety at studentar får det meir romsleg økonomisk, og at dei faktisk er i stand til å betala for seg.

– Men vil ikkje dette ekstra månadsstipendet berre gå til fest og fyll?

– Nei, eg reknar med at folk brukar pengane sine fornuftig. Juni er jo den månaden det er minst fest og fyll, for då nærmar det seg eksamen.

• LES OGSÅ: Vil firedoble antall studentboliger

Får støtte frå studentane

– Eg tykkjer det er flott. Dette støttar den nasjonale studentpolitikken som me fører gjennom norsk studentorganisasjon, seier Magnus Aasheim, leiar i styret for studentparlamentet ved Høgskulen i Sogn og Fjordane.

Han peikar på at studentane ønskjer å fokusere på studiane, men at dagens situasjon gjer at mange må finna seg ein jobb.

– Ein ønskjer jo å bruka tida si på studiar og ikkje på jobb. Men slik det er i dag, at ein får støtte i ti månader, so må ein finne seg jobb, seier Aasheim.

• LES OGSÅ: Straffer boligsparende studenter med stipendkutt

Trur på landsmøtevedtak

Men før Aasheim og dei andre studentane kan sjekke kontoen, må politikken vedtakast av Arbeiderpartiet sentralt.

– Det blir spanande å sjå på landsmøtet, for det kostar mykje pengar, seier Aarvoll i AUF.

Han har likevel trua på at studentane vil få det litt lettare økonomisk mot slutten av skuleåret i framtida.

– AUF har vedteke det i fleire og fleire fylkeslag, so me er absolutt positiv til at dette kan bli regjeringspolitikk dei neste fire åra.

Det same er studentleiaren Aasheim.

– Eg er veldig positiv, so eg håpar det går gjennom.