Vil gå rettens veg etter arbeidsulukker ved Nordfjord Kjøtt

Arbeidstilsynet har meldt Nordfjord Kjøtt til politiet etter ei av ulukkene. Dei to arbeidarane krev 150 000 kroner kvar i erstatning.

Nordfjord Kjøtt har så langt avvist kravet, men advokat Odd Arne Nilsen seier slovakane då vil gå rettens veg.

– Bedrifta har avvist begge krava. Det betyr at dei to skadde vil ta saka vidare og gå til rettslege steg, seier advokat Odd Arne Nilsen, som representerer dei to slovakiske arbeidarane.

• LES OGSÅ: Fekk alvorlege syreskadar – Nordfjord Kjøtt varsla ikkje Arbeidstilsynet
• LES OGSÅ: Blei sjuk – står utan arbeid

Saka om arbeidstilhøva ved Nordfjord Kjøtt vil etter alt å døme ende i rettsapparatet. Denne veka fortalde slovakiske Alojz Stefka at han vart sett til å jobbe med ei farleg og defekt maskin som gjorde at han mista fingeren.

Saka er meldt til Politiet av Arbeidstilsynet som meiner verksemda har brote Arbeidsmiljølova på tre ulike punkt.

Både Alojz Stefka og kollegaen Marek Veis, som fekk handa si skada då syre trengde inn i arbeidshansken har kravd verksemda for 150 000 kroner kvar i erstatning.

• LES OGSÅ: Faren var døyande – no står sonen utan arbeid
• LES OGSÅ: Mange bedrifter med utanlandske arbeidarar strevar med tryggleiken

Ønskjer ikkje å kommentere påstandane

Advokaten deira Odd Arne Nilsen meiner det er god grunnar til å ta saka opp i retten.

– Vi får sjå kven som får rett til slutt. Arbeidstilsynet har jo vore inne, og har, slik eg forstår det, komme med ein ganske kritisk rapport, seier Nilsen.

Administrerande direktør i Nordfjord Kjøtt Geir Egil Roksvåg vil ikkje kommentere denne saka.

Han har tidlegare vist til HMS-undersøkingar i bedrifta som viser til eit godt arbeidsmiljø, NRK har ikkje fått intervju med lokale tillitsvalde. Dei skriv i ein e-post til NRK at dei meiner verksemda tek godt vare på sine tilsette.

• LES OGSÅ: Rema 1000 vil granske Nordfjord Kjøtt
• LES OGSÅ: Landbruksnæringa krev betre arbeidsforhold hos Nordfjord Kjøtt
• LES OGSÅ: LO uroa for at utanlandske arbeidarar blir dårleg integrert i lokalsamfunna