Vil frakta skituristar til fjells med helikopter

Heliskiing vil seie at skikøyrarar blir frakta med helikopter til fjell eller isbrear som elles er relativt utilgjengelege. I Norge er det forbod mot å drive med dette.

Asbjørn Nes i Fjord Helikopter er prosjektleiar for arbeidet med å få på plass eit tilbod om heliskiing i Sogn og Fjordane. No har han sendt søknad til miljøvernminister Tine Sundtoft om å få løyve.

–Vi søkjer om å drive heliskiing i heile Sogn og Fjordane. Vi ønskjer å starte opp frå januar. Dette er eit tid på året det er stille hos både oss og hotella. Om dette blir marknadsført på rett måte, kan det lokke mange skituristar til Sogn og Fjordane, seier han.

• LES OGSÅ: Vil mjuke opp reglane i utmark - kan opne opp for catskiing og meir skuterkøyring
• LES OGSÅ: -Naturen blir ei leikegrind for motoraktivitet ved oppmjuking av skuterkøyring

Har tru på den nye regjeringa

Medan Høgre og Frp sat i regjeringsforhandlingar, kom det fram at partia opna for ei oppmjuking av motorisert ferdsel i utmark. Mellom anna kan det bli opna opp for meir skuterkøyring og Harpefossen skisenter i Eid ønskjer å drive catskiing, som betyr at skiløparar blir frakta til fjelltoppen med trakkemaskin.

Asbjørn Nes har stor tru på at den nye blå regjeringa er positiv til søknaden om heliskiing.

– Det nye regimet har heilt klart signalisert at dei vil sjå på delar av motorferdsellova og mjuka den opp, seier han.

Seier tilbodet er etterlengta

Dei søkjer om å få starte opp heliskiing frå fire fjelltoppar i Sogn og fire i Nordfjord.

– Vi har ikkje sett opp spesifikke fjelltoppar i søknaden, men dette skal vi komme tilbake når vi har fått ein dialog med miljøvernministeren. Vi skal også diskutere det med dei forskjellige kommunane og ekstremsportmiljøet i fylket.

Nes seier eit slikt tilbod er etterlengta og at dei får mange spørsmål om dette.

– Ja, det er mange som spør og vi må alltid seie nei fordi det er forbode.

Tett samarbeid

Helikopterselskapet har eit tett samarbeid med dei største hotella, reiselivsverksemdene og reisemålselskapa i Sogn og Fjordane.

– Dei vi har vore i kontakt med er svært positive til pilotprosjektet. Får dei ja til å drive med dette, vil det vere med guidar på turane. Dette vil betyr ein stor og ny marknad for reiselivet i Sogn og Fjordane.

Han veit det er mange som er motstandarar av motorisert ferdsel i fjella. Han er budd på negative reaksjonar på både søknaden og om dei skulle få lov.

– Dette skal gjerast på ein forsiktig og skånsam måte som mogleg. Vi har så store fjellområde at det er god plass til alle. Eg trur vi får reaksjonar, men eg håper på ein positiv dialog.

• LES OGSÅ: Vil frakte skituristar til topps med tråkkemaskin - ber om eit svar snarast mogleg
• LES OGSÅ: Vil køyre skituristar i trakkemaskin opp på fjellet