Det meiner Ayad Mawloud frå Førde Islamske Senter. Dei hadde planane klare for å byggje moské i Sogn og Fjordane, men økonomien strakk ikkje til. Likevel er draumen om ein stormoské der.
- Les meir:
– Muslimar i Norge treng ein stad å praktisere religionen sin, slik dei hadde i heimlandet, seier Ayad Mawloud.
Han trur ein møtestad for muslimar er viktig for å forhindre radikalisering blant unge.
– I dag er det mange grupper som påstår at dei snakkar i islam sitt namn. Fleire vert radikaliserte eller aggressive fordi dei ikkje går i moskéen og lærer kva islam eigentleg er, seier Mawloud.
– Skal du vere ein god muslim må du tru på Gud, vere snill, ha respekt og vise kjærleik. Vald eller det å dømme andre er ikkje i samsvar med islam.
Betre enn radikale krefter i sosiale medium
Mohamed Abid Sheikh frå Nordfjordeid er ikkje religiøs sjølv, men har engasjert seg for eit kultursenter for muslimar, og er i dialog med kommunen om dette.
– Det er viktig å ha ein møtestad, der ein kan prate saman om kva som skjer i det muslimske samfunnet.
Han er spesielt uroa over barn og ungdom som veks opp utan å ha moderate muslimar å sjå opp til.
– Dei kan verte fanga opp av meir ekstreme krefter i sosiale medium.
- Les meir:
FrP: – Ein dårleg idé!
Frank Willy Djuvik frå FrP meiner det er det motsette som skjer i moskéane.
– Dess meir religion du prentar inn i ungdommane, jo meir radikale vert dei, seier han.
– Har vi ikkje religionsfridom i Norge?
– Det har vi. Om muslimar ynskjer å oppsøkje moskear, er det sjølvsagt fritt fram. Likevel er det ein dårleg idé. Det kan føre til dårlegare integrering og meir radikalisering. Ein bør heller integrere muslimane i det norske samfunnet.
– Kan styrke dialogen i lokalsamfunnet
Sheikh, som også står på femteplass på Sogn og Fjordane SV si stortingsliste, meiner ein moské kan styrke kontakten mellom muslimar og andre i lokalsamfunnet.
– Dei som styrer moskéen kan ha kontakt med kommunen og andre i lokalsamfunnet. Det kan opne det muslimske miljøet og skape god integrering.
Slik kan også moskéane forsøke å ha kontroll på kven som utviklar radikale idéar.
– Om dei vil forhindre radikalisering, kan dei samarbeide med politi og kommune.
Forhindrar fråflytting
Sheikh trur også moskéar i distrikta er viktige for å forhindre fråflytting til større muslimske miljø i storbyane.
– Eg har snakka med fleire muslimar som ynskjer å bu i fylket, men som synest det er noko vanskeleg utan ein slik møteplass som ein moské kan vere.