– Det står bra til med friidretten i fylket. Så kan ein alltid ønskje at det blir betre, seier Narve Heggheim, dagleg leiar i Sogn og Fjordane friidrettskrins.
Han er godt nøgd med prestasjonane til dei 22 lokale utøvarane som denne helga deltok på senior-NM på Askøy.
Til saman vart det åtte medaljar, to gull, fire sølv og to bronse. Det stemmer god overeins med Heggheim sine forventningar i forkant.
– Sjølvsagt skal ein konkurrere først, men friidrett er ein målbar idrett. Denne gongen innfridde medaljekandidatane våre til det fulle.
Gull og sølv
Ein av dei som gjorde eit sterkt NM var løparen Marius Vedvik frå Førde. Vedvik, som spring for Gular, fekk gull på 5000 meter og sølv på 10.000 meter.
Spesielt på 5000 meter likte Heggheim det han såg.
– Tidlegare har han lagt seg i front og drege opp farten, men no låg han bak i feltet og let dei andre gjere jobben i starten. Så kom han med ein langspurt på slutten og sikra eit solid gull.
På 10.000-meteren var Vedvik ifølgje Heggheim litt tilbake til gamle synder, noko som straffa seg. Men han kom seg opp att og sikra sølvet, og var ikkje så langt frå gullet på oppløpet, konstaterer Heggheim.
- Les også:
- Les også:
Vil ha fleire sterke klubbar
Fire av åtte medaljar til fylket er henta heim av utøvarar frå Gloppen FIL. Heggheim seier dette er den sterkaste klubben i fylket akkurat no.
Saman med Florø T&IF er dette klubbane med dei sterkaste miljøa for friidrett i fjordfylket.
– I enkelte deler av fylket skulle vi ønskje at fleire var med på friidrett. Dette er noko vi må jobbe med i lag med klubbane, seier Heggheim.
Held fram arbeidet
Han seier Florø og Gloppen har sterke tradisjonar for friidrett, i tillegg til at dei har gode anlegg og allsidige og gode trenarar.
– I mindre klubbar er det litt meir varierande. Friidrett er ein krevjande idrett å vere med på, fordi det er så mange øvingar. Det å trene og få fram utøvarar krev kanskje litt meir enn i ein del andre idrettar.
Heggheim understrekar at det er utøvarane sjølve som saman med klubbtrenarane jobbar fram gode resultat. Samtidig gjer krinsen det dei kan for å legge til rette for eit blomstrande friidrettsmiljø i fylket.
– Vi prøver å knytte klubbar som er sterke til utøvarar som er få i sin klubb, slik at vi får til ei erfaringsutveksling på tvers av klubbane. I tillegg handlar dette om å få utdanna trenarar og eldsjeler, og her har vi ei viktig rolle.