– Eg synest det er moro å vere med framover, og det vil eg gjerne halde fram med, seier Victor Grodås.
Han har nettopp gått av bana etter bitre 0–2 i treningskampen mot gamlelaget Hødd.
– Eg ser vi har ein del å ta tak i. Det er mykje bra, men vi har ein jobb å gjere framfor oss. Så det er berre å jobbe vidare, seier han.
- Les også:
Er tydeleg interessert i å bidra i det offensive
Sogndal fekk aldri spelet til å sitje skikkeleg i treningskampen mot divisjonskollega Hødd i Sognahallen. Heimelaget hadde ballen mykje, men sleit med å få rytme i spelet.
Dermed kunne Hødd liggje lågt i bana og køyre kontra mot Sogndal. Det resulterte i eitt mål i kvar omgang – begge to etter blunderar av sogningane.
Victor Grodås spelte sin andre kamp etter overgangen frå Hødd. Mot Nest-Sotra fekk han si første nettkjenning, og også mot Hødd var han tydeleg interessert i å vere med offensivt. 23-åringen var stadig spelbar ute på kanten, og han kom til fleire innlegg.
– Sogndal har ein litt annan måte å spele på, og det tar litt tid å komme inn i det. Men det er inga krise å tape mot Hødd, sjølv om det er kjedeleg å tape mot gamleklubben. No øver vi på det vi skal bli betre på. Eg trur dette blir veldig bra, seier han.
- Les også:
Fekk retta på problema – siktar mot høgt nivå
Det er berre nokre månader sidan venstrebacken sleit med eit hjarte som slo ubehageleg fort. Den raske pulsen gjorde at Grodås måtte ta det med ro i fleire veker. Han mista sju-åtte kampar med Hødd i førstedivisjon.
– Eg veit ikkje heilt kva det var. Legane sa at eg var litt overtrent og kanskje også feiltrent. Men eg fekk retta på det, og no er eg heilt fin, seier han.
– No vil eg spele på høgast mogleg nivå, og Sogndal er eit godt steg på vegen. Det hadde vore veldig kjekt med eit opprykk her, seier Grodås.
- Les også:
Sogndal manglar fleire frå førsteellevaren
Framleis må trenar Eirik Bakke klare seg utan fleire spelarar, som vanlegvis vil gå rett inn på laget. Spesielt vil midtstoppar Hannu Patronen vere ein viktig brikke når han er tilbake.
Mot Hødd fekk unge spelarar som Fredrik Flo og Simen Lefdal sjansen til speletid – førstnemnde debuterte frå start.
- Les også:
– Det er aldri ideelt å mangle så mange spelarar frå førsteellevaren. Spesielt når det er så viktige spelarar også. Men det gjer samstundes at mange unge får sjansen. No får dei kjenne på nivået i førstedivisjon, og det er positivt, seier Bakke.
– Vi har treningskampar for at vi skal bli betre. Eg er ikkje så oppteken av resultatet, seier han.
Bakke meiner prosjektet hans vil ta tid
Sogndal har starta dei første kampane under Bakke i ein 4-3-3-formasjon. Mot Hødd starta laget i 4-4-2, før dei la om til 4-3-3 igjen ut i andre omgang.
Trenarteamet fekk også denne gongen sett mange spelarar i aksjon.
– Korleis er status for Sogndal no?
– Det går litt fram nokre dagar, litt tilbake andre dagar. Det viktigaste er at folk jobbar hardt, at vi får kampar i beina og at vi får skikk på måten vi vil spele på. Det kjem til å ta tid, seier Bakke.
- Les også:
Hødd sine mål vart scora av Magnus Myklebust og Joachim Magnussen.