Vikjene krev at regjeringa held valløftet

Fylkeslaga til Høgre og Framstegspartiet møter i dag samferdsleminister Ketil Solvik-Olsen (Frp) og resten av den politiske leiinga i Samferdsledepartementet.

I Vik har Olav Turvoll og sambygdingane klare forventingar til møtet. Stikkordet er Vikafjellstunnel.

• Les også: – No er det Vikafjellstunnelen sin tur

– Planane ligg nesten klare, og vi meiner dei bør få dette i gang i løpet av denne NTP-perioden, seier Turvoll, som fungerer som ordførar for ein ferierande Marta Finden Halset (Ap).

– Truverd står på spel

Begge regjeringspartia har lova å flytte oppstarten fram til første planperiode av Nasjonal transportplan (NTP) – altså før 2018. Under sist valkamp kom dåverande samferdslepolitisk talsperson i Frp, Bård Hoksrud, med ein av dei mest tydelege lovnadane.

• Les også: KrF krev Vikafjellstunnel no

Hoksrud, som i dag er statssekretær, meinte det ikkje var noko i vegen for å starte bygginga i 2014–2015.

• Les også: Fylkesleiarar krev at valløfte blir følgt opp

– Truverdet hans står på spel. Vi ventar at det er hald i det som blir sagt før eit val, seier Turvoll.

– Viktig for Sogn

Tunnelen på 16 kilometer vil venteleg koste mellom ein og to milliardar kroner. Fjellovergangen var førre vinter stengd i over 1.000 timar. Også i vinter har fjellovergangen vore hyppig stengd. Han er framleis ikkje open etter at han vart stengd før helga.

• Les også: Ordførar krev tunnel etter kjemperas

Ein tunnel vil sikre heilårssamband mellom Vik og Voss.

– Vik er avhengig av å få tunnelen, men det blir også ei viktig ferdsleåre for heile Sogn. Når noko skjer, så har ein omkøyringsmoglegheit som ein ikkje har i dag, seier Turvoll.

Tek opp utfordringar

Fylkesleiar i Høgre, Arve Mjømen, lovar at Vikafjellstunnelen er blant samferdsletiltaka utsendingane frå Sogn og Fjordane vil ta opp med statsråden under det timelange møtet.

Det same gjer forfallet på vegnettet, E39, Kystvegen og ferjeavløysingsmidlar. Fylkeslaga til regjeringspartia har også bede samarbeidspartia Venstre og KrF om innspel.

• Les også: Ordføraren i Vik skuffa over at Vikafjellsvegen ikkje fekk planleggingsmidlar
• Les også: - Eg er grådig skuffa. Ikkje pengar til E39 Bjørset-Skei, konstaterer Jølster-ordføraren

– Vi meiner det er viktig for Sogn og Fjordane fylke å få belyst kva vi slit med av utfordringar på vegsida, og har med oss vegproblem og utbetringar som vi ynskjer å gjere noko med, seier Mjømen.