Den unge vikjen skal vere med landslaget til Tyrkia der dei deltek på Aegean Cup, saman med Hellas, Hviterussland og vertsnasjonen.
- Det er stort, jublar fylket sin siste landslagsspelar i fotball.
Håpar på sjansen
Gustav Valsvik vart orientert om landslagsuttaket etter skulen måndag. Med andre ord ein god start på det nye året for den talentfulle fotballspelaren. Turneringa går av stabelen i slutten av januar.
- Eg reknar ikkje med å få spele så mykje frå start, men håpar og trur at eg kanskje får prøve meg. Eg er ny i troppen, og det er mange som har vore med lenger enn meg, seier den talentfulle 16-åringen som enn så lenge har planar om å bli verande i Vik. Aalesunds FK har vist interesse for Valsvik.
Sterk sesong for Vik
Det heile byrja i fjor sommar med forbundssamling i Porsgrunn. Ein sesong der han også var med på å føre Vik til 3. divisjon. Midtstopparen med Liverpool som favorittlag fekk med seg samtlege 22 seriekampar og noterte seg for 13 mål i opprykkssesongen. Han vart også kåra til årets unge spelar i Vik.
Han har i tillegg spela treningskampar for Sogndal sitt juniorlag mot Fjøra. Spelarutviklar i Sogndal, Torbjørn Glomnes, har i tillegg følgd opp 16-åringen.
Andre på landslaget
Valsvik blir den andre vikjen på eit fotballandslag. I tillegg har spelande trenar i Vik, Stig Roar Hovland, fått fleire landskampar med innandørslandslaget.