Vi blir fleire - men det går for sakte

Og folketalet har auka med små, små steg sidan 2007. Svein Arne Skuggen Hoff, som er fylkesdirektør for plan og samfunn, synest stega er for små.

– Tala viser at vi framleis har utfordringar med å få til ein vesentleg auke i folketalet. No er det viktig å utvikle strategiar for å få innvandrarar til å bli verande i Sogn og Fjordane. I tillegg bør vi arbeide for å redusere innanlands utflytting.

For det er eit faktum at det er langt fleire som flyttar frå Sogn og Fjordane enn til. I 2015 var det 2025 som flytta innanlands til Sogn og Fjordane, 2823 flytta frå fylket.

Det er innvandringa som bergar plusstalet i utviklinga siste året. Siste året kom det 1499 innvandrarar til Sogn og Fjordane, medan 371 personar utvandra.

Når vi i tillegg tek med at vi hadde eit lite fødselsoverskot (+ 99) så enda det med at vi ved siste årsskiftet tel 360 fleire enn året før.

• Les også: Halvert folketal på 53 år - berre to fødde i fjor
• Les også: Skal Sogn og Fjordane få god vekst i folketalet må vi få fleire innvandrarar
• Les også: Folketalet stuper i Årdal

Naustdal auka mest

15 av dei 26 kommunane hadde auke i folketalet, prosentvis størst auke var det i Naustdal, der dei vart 63 fleire (+ 2,3 prosent). I Sogndal vart det 162 fleire (+ 2,1 prosent), i Aurland og Gulen var det 1,5 prosent auke.

Både Flora og Førde hadde auke, Flora med 61 til 11.923 (+ 0,5 prosent) ved siste årsskiftet, Førde med 99 til 12.900 (+ 0,8 prosent).

Dei to minst folkerike kommunane var også dei som hadde størst prosentvis nedgang siste året. I Solund minka folketalet med 1,9 prosent til 785, i Hornindal med 1,7 prosent til 1200. I Årdal gjekk folketalet ned med 1,3 prosent til 5359.