NRK Meny
Normal

Fotballpresident skulda for korrupsjon i ny bok

I ei ny bok, "Fotballagenten – Røverhistorier frå Fotball-Norge" frå tidlegare fotballagent Knut Høibraaten, vert fotballpresident Yngve Hallén, skulda for korrupsjon som dagleg leiar i Sogndal.

Yngve Hallén

AVVISER SKULDINGANE: Fotballpresident og dåverande dagleg leiar i Sogndal Fotball, Yngve Hallén, vil forfølgje skuldingane juridisk.

Foto: Aas, Erlend / NTB scanpix

Fleire aviser presenterer i dag skuldingane mot fotballpresident og tidlegare dagleg leiar i Sogndal Fotball, Yngve Hallén, i ei ny bok som vert lansert.

Her blir den dåverande leiinga i Sogndal Fotball skulda for å ha motteke svarte pengar under bordet i samband med overgangen til Piotr Leciejewski frå Polen til Sogndal før 2008-sesongen.

Kravde 40 000 kroner

Forfattar av boka "Fotballagenten – Røverhistorier frå Fotball-Norge" hevdar i boka at ein polsk FIFA-agent, Marcin Hakman, skal ha tatt kontakt og informert om at dåverande direktør i Sogndal Fotball, Ynvgve Hallén, og ein sportsdirektør ville ha pengar under bordet før dei signerte den noverande brann-keeperen.

Ifølgje VG skal dei ha kravd rundt 5000 euro (cirka 40 000 kroner) kvar.

Avviser alt

Ein epost frå Hakam vert publisert i boka som dokumentasjon på påstandane. Men Hakam avviser overfor VG at han har gitt nokon pengar under bordet, og kallar skuldingane for "bullshit".

– Eg er ikkje korrupt. Om boka kjem ut, vil eg forfølge det juridisk, seier han.

Yngve Hallén kjende ikkje til innhaldet i boka før avisene kontakta han. Hallén avviser på det sterkaste skuldingane om korrupsjon og varslar juridisk etterspel, og vil krevje påstandane dementerte og trekte tilbake.

Vil ikkje finne seg i det

Han seier og at det ikkje er haldbart for han i sin posisjon å ha skuldingar om korrupsjon hengande over seg.

– Det er ikkje haldbart for meg å ha desse skuldingane hengande over meg. Dette er direkte skuldingar om korrupsjon og har absolutt ikkje rot i verkelegheita. Eg skal finne meg i mykje rart, men dette finn eg meg ikkje i, seier Hallén til avisa.

Forfattaren av boka seier han ikkje veit om Hallén eller nokon andre tok imot pengane.

Bønder føler seg ikkje trygge på vegen med traktor
Orkanen Tor var ikkje ekstrem nok
Ordninga bør endrast