– Per i dag er det inga endring i siktinga, seier regionlensmann Arne Johannessen.
Mannen i 40-åra er framleis sikta, både for narkotikalovbrot, falsk forklaring i Veronica-saka og lekamskrenking mot Veronica Heggheim Stegegjerdet.
Mannen vart først sikta for falsk forklaring, men denne vart i desember utvida til også å gjelde vald mot kvinna. I tillegg er han sikta for omgang med kring ein kilo hasj.
Ventar på svar frå Kripos
Heggheim Stegegjerdet vart funnen død i Barsnesfjorden 14. november, ikkje langt frå heimen sin i Årøy i Sogndal, etter omfattande leiteaksjonar og søk i nær tre veker. Dødsfallet blir etterforska som mistenkeleg.
– Me har etterforskarar som jobbar med dette på fulltid her i Sogndal. Me har og diverse prøver som ligg hjå Kripos for analyse. Det er ein god del arbeidsoppgåver som står att. Me vil fortløpande vurdere kva som blir den vidare innsatsen i saka.
Han vedgår at det er færre som jobbar med saka, men seier det ikkje betyr at etterforskinga er trappa ned.
– Det betyr berre at me har færre arbeidsoppgåver per i dag, men det kan endre seg. Me har som sagt ein del ting som ligg hjå Kripos for analyse, seier Johannessen.
Ny vurdering neste veke
Førre onsdag vart hovudkonklusjonen i obduksjonsrapporten kjend. Den var at Veronica døydde av drukning. Lensmannen vil ikkje seie meir om innhaldet, av omsyn til etterforskinga.
Men han kan fortelje at politiet ikkje har nye personar i søkelyset når det gjeld det mistenkelege dødsfallet. Neste veke kan det bli klart kva som skjer med siktinga mot mannen i 40-åra.
– Neste veke vil me sjå på vegen vidare og kva arbeidsoppgåver som står att, saman med Kripos og etterforskarane i saka. Når me ser oss ferdige med etterforskinga er det opp til påtalemakta å vurdere kva dei vil gjere når det gjeld tiltalen, seier Johannessen.