- Å få verdas største cruiseskip til kai i Flåm er skikkeleg god reklame, seier hamnesjef John Johnsen.
Skipet er på 148.000 bruttotonn og har 3000 passasjerar.
Hamnesjefen seier det er ei omlegging av ruta som gjer at skipet kjem til Flåm.
- Skipet skulle i utgangspunktet gått på cruise i Middelhavet, men må ligge ei tid i dokk. Dette opna for eit ekstra cruise til dei norske fjordane, seier Johnsen til Sogn Avis.
Hittil er det meldt inn 29 stogg av cruiseskip i Flåm i mai. Ifølgje hamnesjefen er dette ny rekord for denne månaden.
