– No høyrer du at signalet byrjar å bli forferdeleg dårleg, seier Borch-Åmot.
Det blir stille i bilen til Frank Anders Borch-Åmot i det han køyrer frå heimen sin i Jølster mot Sogndal. På displayet i bilen står det at favorittkanalen hans P13 er valt på DAB, men radioen er taus.
Frank stoggar bilen og hentar opp mobilen. I det siste har han byrja å bruke nettradio.
– Her vi står no er det ikkje DAB-dekning, men via blåtann kan eg høyre radio via mobilen.
Nettradio
For sjølv om NRK sine hovudkanalar skal nesten ha full dekning i Noreg, treng dei kommersielle og nisjekanalene som P13 berre dekke 90 prosent.
Dei 3000 kronene det kosta å få DAB i bilen meiner han er bortkasta.– Personleg meiner eg at det ikkje er godt nok, verken dekning eller lydkvalitet. Stadig vekk opplever eg at lyden blir grautete.
– Uheldig å låse seg til DAB
– DAB er 25 år gamal teknologi og allereie gamaldags. I framtida trur vi at stadig fleire vil velje nettradio, seier Per Morten Hoff, generalsekretær i IKT Norge.
Hoff tykkjer det er uheldig at NRK og dei kommersielle radiokanalane har låst seg til DAB-teknologien, når det i framtida vil komme betre alternativ. Sjølv om mobilnettet ikkje ville takle det om alle byrja å høyre på nettradio i dag, vil det vere mogleg i framtida, seier han.
– Om nokre år får vi 5G som neste generasjons mobil, den er 1000 gonger raskare og med langt større bandbreidde. I utgangspunktet vil internettradio ha betre lyd, og etter kvart også betre dekning.
Samstundes har radionettet aldri vore bygt ut i ein slik skala som i dag.
Tidlegare var det berre ein kommersiell kanal med 90 prosent dekning på FM-nettet.
DAB er framtida
Distribusjonssjef for radio i NRK, Petter Hox, seier at DAB er ein teknologi for framtida og er den radiostandarden mange i verda brukar.
– NRK har valt DAB som er ein verdsomspennande standard. Det er den som skal overta for FM og vare i mange år framover.
– IKT Norge meiner det er feil å satse på DAB, og at ein i staden bør satse på nettradio?
– Eg meiner vi har valt begge delar, så kan folk velje det dei sjølv ynskjer. Men for mobilt mottak så er DAB det aller beste, seier Hox.
For Frank Anders Borch-Åmot er det berre eitt alternativ: Nettradio på mobil. Men med dagens teknologi blir det dyrt.