Dei hadde Årets kulturidé - kan gle seg over 100.000 kroner

Avgjerda fall under ettermiddagens radiosending frå hagen til NRK Sogn og Fjordane. Prisen er eit samarbeid mellom NRK Sogn og Fjordane og Sparebankstiftinga i Sogn og Fjordane. Juryleiar Pål Fidjestøl seier Våt moro fekk flest røyster og var ein klar vinnar.

I grunngjevinga stod det:

Årets vinnar har tydelegvis treft ei nerve i publikum, både i form av å ha eit soleklart fleirtal i avstemminga – og på sjølve arrangementet. som allereie første år begeistra eit stort publikum.

I tillegg har dei samla både kompetanse og entusiasme frå nær sagt heile fylket for hjelp til både å utvikle ideen og til å gjennomføre festivalen. Dei har elles eit potensial til å at resten av landet med storm. Eller kanskje rettar sagt« resten av vatnet». For vinnaren er Våt moro i Florø!

• LES OGSÅ: Her er alle finalistane til Årets kulturidé

Ei stor anerkjenning

Til stor applaus kom Roger Bareksten og Sander Ødelien opp på scena for å ta imot hyllest og ein sjekk på heile 100.000 kroner.

– Først og fremst er dette ei stor anerkjenning av det arbeidet vi har halde på med i snart to år. Denne prisen er ein stor inspirasjon for å halde fram, seier Bareksten.

• LES OGSÅ: Vil ha alle med på våt moro

Sander Ødelien seier han forstod at dei fekk prisen då dei blei sagt at den første festivalen var i fjor og at den blei ein stor suksess.

– No skal vi bruke pengane til å dra festivalen utover året, med kurs og aktivitetar, seier han.

• LES OGSÅ: Slik var den våte helga i Florø
• LES OGSÅ: Garanterer ny festival

(Artikkelen held fram under videoen)

Skal vere litt ekstremt

Våt moro er ein ti år gammal draum som blei realisert for første gong i fjor ved hjelp av fleire tusen dugnadstimar utført av ein haug med eldsjeler som er glade i Florø og aktivt friluftsliv. Festivalen legg vekt på fart, spenning og moro.

Målet er å setje Florø endå meir på kartet, også langt utanfor bygrensene.

– Prisen er eit klapp på skuldra for alle oss sin driv med dette.

– Er dette ein festval for alle eller berre våghalsar?

– Det skal vere ekstremt og marknadsføringa er spissa mot det. Men vi lovar eit tilbod for alle, også dei aller minste.

Ti finalistar har kjempa om å bli Årets kulturidé 2013. Juryen sine ti finalistar har siste vekene blitt presentert både på nett og i radio. Siste tida har også publikum kunne røyste på sin favoritt. I fjor var det musikkfestivalen Utkant som stakk av med prisen og pengane.

10.000 for beste presentasjon

I tillegg til hovudprisen, blei det også delt ut 10.000 kroner til den beste presentasjonen i løpet av sendinga i dag. Det var lyttarane som kåra vinnaren ved å sende tekstmelding med sin favoritt. Dei som stakk av med pengane var Der båra bryt. Det er ei gruppe i Bremanger som har ambisiøse planer om eit vandreteater på Grotlesanden til neste år.

Målet er å ta vare på den gamle kulturhistoria, og presentere den til publikum medan dei går langs sanden og bølgjeskvulpet.

Grete Berntzen, Reidun Øvrebotten og Elisabeth Solbakken var til stades i NRK-hagen og dei glade damene fekk sjekken som kjem godt til nytte.

– Dette var veldig kjekt. Tusen takk til alle som har stemt på oss.

Sjå Våt moro-festivalen 2012 i bilete: