Valforskar trur hordalendingar vil røyste bompengepartiet for å sleppe sogn- og fjordingar

Folkeaksjonen nei til mer bompenger stiller med ei rein hordlandsliste i det fyrste fylkestingsvalet i Vestland. Listetoppen i partiet, Knut Inge Andersen er utflytt sunnfjording, men det finst verken lokallag eller politikarar med same hjartesak i Sogn og Fjordane per no.

Eit «hordaland-alternativ»

– Dei klassiske partia har sørga for at Sogn og Fjordane er prioritert på listene, seier valforskar i Norce, Yngve Flo.

Det ligg an til eit høgt vekttal av politikarar frå Sogn og Fjordane på fylkestinget. 20 parti stiller liste til det fyrste fyklestingvalet. Flo seier det blir spennande å sjå om bompengepartiet haustar stemmer frå folk som fryktar Sogn og Fjordane-dominans.

– Eit parti som allereie ligg høgt på målingane kan appelere til dei som ikkje nødvendigvis brenn spesielt for bompengesaka, men som oppfattar dette som eit «hordalands-alternativ», fortel Flo.

Trur folk stemmer på politikken

– Det er ein interessant teori, men eg trur dei som stemmer på oss sympatiserer med politikken vår, seier Trym Aafløy.

Han er fyrstekandidat til Folkeaksjonen nei til mer bompengar i Bergen -og tredjekandidat til Vestland Fylke.

– Folk har ulike motiv for dei vala dei gjer, og vi gler oss berre over kvar einaste stemme vi får, seier Aafløy.

– Folk er seg sjølve nærast

Sjølv om Sogn og Fjordane har lange tradisjonar for bompengar, er det for tida berre éin bompengering i fylket, Førdepakken. Aafløy meiner det naturleg nok ikkje vil kome mange stemmer frå Sogn og Fjordane grunna dette.

– Folk er seg sjølv nærast, og oppslutninga vår er nok sterkast i dei regionane der det er lokale bompengeparkar, seier han.

Dei har likevel ein taktikk for å vinne over fleire veljarar. Aaflø trur dei lokale politikarane vil gjere jobben for dei.

– Etter kvart som dei foreslår bompengepakkar rundt om i fylket, vil vi få auka oppslutting, seier han.

• Les også: Bompengepartiet meiner imaget er «fullstendig feil»
• Les også: Bompengeparti kan bli joker i flere store byer