Uvisst kva lag og organisasjonar gjer med nye grenser

– I vedtektene står det at vi skal vere delt inn i fylkeslag. Står dei seg, så må vi slå oss saman med Hordaland til eitt fylkeslag, seier fylkesleiar i Utdanningsforbundet, Steinar Strømsli.

Om få veker skal fylkespolitikarane i Sogn og Fjordane og Hordaland seie ja eller nei til å slå seg saman til ein ny region. Går dei vidare med intensjonsavtalen som ligg på bordet og Stortinget seier ja, så viskar ein ut nokre av dagens fylkesgrenser.

I Trøndelag har to fylke allereie blitt eitt, og Strømsli trur ein gjer lurt i å hauste erfaringar der ifrå. Det støttar fylkesleiar i Arbeidarpartiet, Hilmar Høl.

• Les også: Kritiserer storfylket: – Ikke all verdens vits
• Les også: Bergen blir hovudstad – nynorsk blir språket

– Det er naturleg å sjå kva dei har gjort i prosessen. Dei har vedteke samanslåing. Dei politiske partia har truleg hatt ein dialog om korleis dei skal løyse det, seier Høl-

Han understrekar at samarbeidet mellom fylkeslaga er godt i dag, og at dei allereie jobbar tett saman på saker mot landsstyre og landsmøte.

Meiner ein treng nærleik

I Innovasjon Norge har ein nyleg inngått leigeavtale om kontor i Sogndal for ti år. Dermed er fylkesdirektøren trygg på at det vil vere tilsette i organisasjonen i fylket i framtida, men det kan skje endringar.

– Det er viktig for verksemder og næringsliv i Sogn og Fjordane å vere nær Innovasjon Norge, så strukturen trur eg ikkje blir gjort noko med. Men det kan vere direktøren sit i Bergen, seier Halvor Flatland.

Sjølv om 2020 er ei stund fram i tid og ingenting er bestemt endå, så har dei fleste laga og organisasjonane så smått byrja å diskutere framtida om fylkesgrensene forsvinn.

– Signala er at krinsane skal haldast oppe slik som no. Det er viktig med nærleik til idretten og vi vil ha kontor i kvart fylke, seier Robert Endestad, styreleiar i fotballkrinsen.

• Les også: Kritiserer storfylket: – Ikke all verdens vits
• Les også: Vil halde kraftmilliardane unna Bergen i det nye storfylket

NRK som no - enn så lenge

I NRK er Sogn og Fjordane og Hordaland nyleg slått saman i region Vest. Den daglege felles fjernsynssendinga «Vestlandsrevyen» har eksistert i 25 år. Regionsjefen trur likevel at det ikkje blir snakk om fleire felles sendingar eller tenester med det første.

– Det ligg ikkje føre planar om endringar no, men NRK skal tilpasse seg samfunnet og ikkje omvendt. seier Kai Aage Pedersen.

– Det vil finnast eit NRK Sogn og Fjordane i 2020 også?

– Eg er heilt sikker på at det blir mykje innhald frå NRK Sogn og Fjordane også i framtida. Om det blir strukturelle endringar på det kan vi ikkje sjå bort frå. Vi har nettopp gjort endringar, og ser ikkje for os store justeringar i næraste framtid.