Utfordrar Nordfjord på skulekutt

På ein eller annan måte må det kuttast i det vidaregåande skuletilbodet i Sogn og Fjordane. Fram mot 2024 må ein spare mellom 72 og 97 millionar kroner, og dette vil svi.

I indre Sogn har ordførarane samle seg om kutt ved Luster vidaregåande, medan det i Sunnfjord er semje om å gjere kutt ved Mo og Jølster vidaregåande si avdeling på Vassenden. Men kva vil Nordfjord gjere? Oppmodinga frå fylkespolitikarane er klar.

– Eg synest det er viktig at det i Nordfjord blir teke ein samla gjennomgang av kva slags tilbod ein ønskjer ha i framtida, seier Noralv Distad i Høgre.

13 skular i dag, men ikkje i framtida?

Skuledebatten har rasa i fylket sidan i haust. I samband med at elevtalet går kraftig ned dei komande åra, og fylkeskommunen får mindre pengar til vidaregåande skular, må dei gjere grep. I dag finst det 13 vidaregåande skular, men om det blir like mange i framtida er slett ikkje sikkert.

• LES OGSÅ: Må kutte mellom 72 og 97 millionar
• LES OGSÅ: Føresler nedlegging av fleire skular

Åtte forskjellige modellar for ny skulebruksplan er no ute til høyring, fire av desse er utarbeidde av konsulentselskapet Norconsult. Med unntak av Norconsult sin modell 0, legg dei andre sju modellane opp til at ein skal ha åtte, ti eller seks skular i Sogn og Fjordane.

Skulane som er truga er Luster, Høyanger og Mo- og Jølster, i tillegg til Dale og Stryn, og til slutt Årdal og Måløy. Alle lokalsamfunna varsla tidleg at dei ville kjempe for sine respektive skular.

• LES OGSÅ: Står samla om skulestrukturen i Nordfjord
• LES OGSÅ: Samarbeid kan berge skulane

(Artikkelen held fram under TV-saka)

Vil ofre Vassenden og Luster

Men når høyringsfristen no nærmar seg, har ordførarar i både Sogn og Sunnfjord samla seg om å ofre noko i sin region.

Sist veke vart det klart at ordførarane i Jølster, Gaular, Førde, Naustdal og Florø godtek nedlegging av skulen på Vassenden. Dei aksepterer at linjene her blir flytta samla til ein annan skule, i praksis til Førde.

• LES OGSÅ: Har gitt opp kampen for Vassenden

Og nokre dagar etter følgde Indre Sogn etter. I ein felles kamp for å behalde det vidaregåande skuletilbodet i regionen er ein der samde om å ofre Luster vidaregåande.

• LES OGSÅ: Samde om å ofre skulen i Luster

Ventar på signal frå Nordfjord

No vil fylkespolitikarane ha liknande signal frå Nordfjord.

– Eg vil i aller høgste grad oppmode dei til å gjere denne øvinga, og prøve å få det til, seier Frank Willy Djuvik som er gruppeleiar i Framstegspartiet.

– Eg skulle gjerne sett at Nordfjord kunne gå i gang med ein prosess der dei prøver gjere noko av det same, stemmer Norvall Nøringset frå SV i.

• LES OGSÅ: Det kan bli over 20 skulemodellar
• LES OGSÅ: Sp: - Nedlegging tvingar seg fram

Vil gjere det lettare for fylkestinget

Nøringset er spent på om dette let seg gjere, og seier innspela frå regionane blir viktig i det vidare arbeidet. I juni er det fylkestinget som endeleg skal avgjere saka.

– Eg synest det er sympatisk av både sogningane og sunnfjordingane at dei prøver gjere det enklare for fylkestinget å gjere eit godt vedtak i juni.

– Det er heilt klart lettare få til ein god prosess og eit godt vedtak om ein har gjort slike grep i alle regionar, seier SV-politikaren til NRK.no.

Trur nordfjordingane får det vanskeleg

Men det kan blir vanskeleg for nordfjordingane å bli samde trur Frank Willy Djuvik i Frp.

– Det er veldig positivt at både Sogn og Sunnfjord har samla seg om felles innspel, og eg meiner Nordfjord må gjere det same.

– Eg forstår at det er større utfordringar for Nordfjord å samle seg, enn det har vore for dei to andre regionane, seier Djuvik.

Han grunngjev dette med at det i dag finst fire nesten likeverdige skular i regionen, Måløy, Eid, Stryn og Firda vidaregåande på Sandane.

– Då blir det mykje vanskelegare å finne saman der nokon skal måtte leggje ned skulen sin eller fjerne det meste av tilboda dei har, seier Frp-politikaren.

Nektar leggje ned skular

I dag er det møte i Nordfjordrådet, og framtida til dei vidaregåande skulane blir tema. Men ingen Nordfjord-skular skal kuttast, seier ordførar Morten Hagen i Vågsøy.

– Det kan kome ei felles fråsegn, men eg trur ikkje den vil innehalde at vi er samde om å leggje ned ein skule. Det trur eg ikkje, seier Høgre-ordføraren.

– Så det skal ikkje kuttast i Nordfjord?

– Jo, da. Det er ikkje sagt at ein ikkje skal ta kutt i Nordfjord. Det er klart vi må sjå på kva fag vi kanskje kan flytte frå ein skule til ein annan. Slik får vi redusert talet klassar.

– Skulane må tole reduksjonar, men ikkje ved å leggje ned skular, seier Hagen.

– Gode fellesløysingar

I andre enden av Nordfjorden er Sven Flo (H) i Stryn samd. Heller ikkje han vil ofre ein av dei fire vidaregåande skulane i regionen.

– Vi vil nok sjå på litt ulike løysingar sett Nordfjord under eitt.

– Vil dokke greie ofre ein skule?

– Eg synest i utgangspunktet at det blir feil vinkling når ein snakkar om å ofre ein skule.

– Det vi er opptekne av er å prøve finne gode fellesløysingar for dei vidaregåande skulane i Nordfjord, seier Flo.

Vil vege tungt

Uansett kva løysing Nordfjord kjem fram til, må dei kome med innsparingar. For Vassenden og Luster sine kutt er ikkje nok åleine, seier Djuvik.

– Vi må nok til med større grep skal vi greie den totale innsparinga, og ikkje minst for at vi skal få konstruert eit best mogleg tilbod for elevane i fylket, seier han.

Han seier signala frå regionane vil vege tungt.

– Vi kjem til å strekkje oss langt for å følgje det som regionane greier samle seg om. Då er vi også avhengige av at alle regionane klar det, seier han.