Uroa for Lærdals-økonomien

- Sjølv om det er ein velståande kommune, så er dei i ferd med å flytte seg høgt opp på gjeldstoppen i fylket, seier fylkesmann Oddvar Flæte.

- Uroleg situasjon

I første omgang avviste Flæte både budsjett og økonomiplanen til Lærdal. Etter ny handsaming i kommunestyret fekk dei likevel godkjentstempelet frå fylkesmannen. Han er uroa for den auka langsiktige gjelda og kva det kan bety for tenestene til innbyggjarane i kommunen.

- Dei har også gått inn i investeringar som er så pass store at dei vil gå utover handlefridomen. Dei er også som kjent i ein noko uroleg situasjon reint administrativt, seier Flæte.

Sanden ikkje uroa

Budsjettet og økonomiplanen var også årsaka til striden mellom ordførar Arne Sanden og rådmann Bent Arild Grytten. Grytten har søkt seg til Hareid kommune, men vil ikkje kommentere budsjettet i Lærdal.

• LES OGSÅ: Alt om Arne Sanden-konflikta

Sanden er glad for at budsjettet no er godkjent, men tek ikkje innover seg uromeldinga frå fylkesmannen.

- Vi er vel kanskje ikkje så sterkt uroa som det fylkesmannen er. Det er også velkjent at Lærdal kommune om nokre år vil få større inntekter frå kraftproduksjon, seier han.