– Fiske har vi halde på med sidan vi var småungar, seier Emil Terdal Igland.
Saman med Tarjei Ryland Røys er han på veg ut på fjorden i ein liten fiskebåt.
– Har ikkje ro i ræva
Folk frå Bremanger har fiska torsk kvar vår i generasjonar. No er det opp til dei unge om tradisjonen får leva vidare. For Røys er det heilt naturleg å driva med fiske.
– Vi har halde på med dette heilt sidan vi lærte å gå. Vi blei sende ned i fjæresteinane. Fekk ikkje lov å sitte inne.
Han kunne ikkje tenkt seg å sitja på eit kontor.
– Det har eg ikkje tolmod til i det heile teke. Eg har ikkje ro i ræva, og må helst bruke energien til noko, seier Røys.
– Det er berre gamlingar
Reidulf Igland bur i Bremanger og har vore fiskar i 40 år. Han meiner bransjen er forgubba.
– Det er berre gamlingar. Pensjonistar. Det er berre gamlingar over 70 år, ler han.
Derfor er han glad for at 18-åringar som Emil og Tarjei heldt tradisjonen ved like.
– Det er heilt fantastisk. Vi skulle hatt fleire av dei der. Det er dei to yngste som er på fjorden.
– Skal fiska til ryggen fer
Tarjei og Emil er i ferd med å henta opp eit garn. Dei er nøgde med resultatet.
– Det vart brukbart. Det tok seg opp litt no på slutten. Vi har vel 250 kilo. Vi seier oss nøgde med det, seier Terdal Igland
Dei planlegg å fortsetja å vere på fiskebåt i framtida, dei vil vera med på den gamle tradisjonen på Bremangerpollen.
– Eg skal fiska heilt til ryggen fer, seier Ryland Røys.