Brå nedgang i talet på asylsøkjarar stoggar nye mottaksplanar over heile landet

Medan det til dømes kom 706 asylsøkjarar frå Eritrea til Norge i august, kom det berre 365 frå same land i oktober.

Ifølgje Utlendingsdirektoratet (UDI) er den nedadgåande trenden tydeleg også i november.

– Bakgrunnen er den brå nedgangen i talet asylsøkjarar til Norge som vi har sett i oktober og november. Den er like brå og uventa som den auken vi hadde månadane før, seier Atle Berge, regiondirektør for UDI Vest, til NRK.no.

Nei til 1800 plassar

UDI har ikkje klart å finne nokon årsak til den store og brå nedgangen, men den fører til at alle planar om nye asylmottak i Norge ikkje blir gjennomført.

– Vi avlyser anbodstevlinga om å etablere tolv nye mottak med til saman 1800 plassar, seier avdelingsdirektør Christine Wilberg i region – og mottaksavdelinga i UDI.

• LES OGSÅ: Får tredd asylmottak ned over seg – no er han grundig lei
• LES OGSÅ: UDI vil ikkje utvide asylmottaket i Årdal - følgjer ønskjet frå kommunen

Stor motstand fleire stader

Ein av kommunane som var aktuelle for etablering av eit nytt asylmottak no, var Stryn i Sogn og Fjordane. Der har motstanden mot asylmottak vore i stor i fleire omgangar, seinast sist sommar.

– Vi har heile tida vore tydelege på ein del utfordringar knytte til den planen som UDI og dei aktuelle aktørane hadde lagt for asylmottak i Stryn. Eg er nøgd med den tilbakemeldinga eg i dag har fått om at det ikkje vil vere aktuelt å gå vidare med planane, seier ordførar i Stryn, Sven FLO (H), til NRK.no.

Både han og fleire andre ordførarar har den siste tida vore kritiske til at kommunane i liten grad kan påverke om eit asylmottak blir etablert eller ikkje i ein kommune.

• LES OGSÅ: Yemane Teferi (54) har blitt flytta rundt på asylmottak i 22 år

Årdal krev svar frå UDI

Blant dei som har gått hardast ut mot korleis UDI jobbar er Årdal kommune. Industrikommunen som vart råka av trippeldrapet på Valdresekspressen måndag 4. november.

– No er tida komen, dei må høyre på kommunane, sa Frank Westad som er rådmann i Årdal kommune.

I brevet dei sende til UDI la kommunen fram sju punkt dei meiner må på plass for å sikre ein betre asylpolitikk:

• Betre helseundersøkingar av asylsøkjarar
• Krav til helsepersonell ved asylmottaka
• Kommunane må ha tid til å bu seg
• Søkjarar med avslag må ikkje ut i kommunane
• Uttransportering må skje samstundes som avslag
• Kommunane må få innføring i å vere vertskommune
• Kommunane må kunne seie nei til mottak

Vil vere med og bestemme

Sven Flo i Stryn gjev no full støtte til Årdal og andre kommunar i eit felles oppgjer mot UDI-systemet.

– Vi har peika på ein del svakheiter, men det som har vore mest kritisk for oss i diskusjonen er jo dette med å få vere med i prosessen og å få vere med og bestemme i høve etablering av asylmottak, seier Flo.

– Har vore god dialog

Atle Berge i UDI Vest vil ikkje vere med på ein diskusjon om kommunane si rolle i etablering av asylmottak og syner til at det vil vere ei politisk avgjersle.

– Men eg har inntrykk av at det vore ein god dialog med kommunen og ikkje minst med ordførar i Stryn. Det som har skjedd no er på landsbasis, der ein har vore nøydd til å avlyse konkurransen om etablering av nye mottak rundt om i heile landet, seier Berge.