Onsdag fortalde NRK om ein lege som ville gje ein alvorleg sjuk baby paracet og nasespray, og bad mora vente på at babyen skulle bli betre.
Ein sjukepleiar frykta for livet til barnet, og overprøvde legen og rekvirerte ambulanse. Det viser lydloggen.
Pasientombod Lisa Førde Refsnes likar svært dårleg at legar ikkje snakkar sant.
– Viss det er ei bevisst handling frå legen, at ein medvite har prøvd å skjule sanninga eller pynte på denne, så er det heilt uakseptabelt, seier pasientombod i Sogn og Fjordane, Lisa Førde Refsnes.
- LES OGSÅ:
Meiner telefonsamtalen er oppdikta
Det var i januar i fjor at den sju veker gamle babyen Irina frå Nessane i Balestrand vart alvorleg sjuk. Ho hadde feber, ville ikkje ha pupp og hadde problem med å puste.
Då legen ikkje ville rekvirere ambulanse, tok sjukepleiaren sjølv affære og fekk likevel tak i sjukebil. Mora til Irina, Renate England, seier legen snakkar usant.
– Legen påstår at det er ho som har rekvirert ambulansen, men det stemmer ikkje, seier England.
– Er du sikker på at det er løgn? Det kan ikkje vere ei misforståing?
– Nei. I det brevet eg har fått frå fylkesmannen, så siterer han noko ho har skrive til dei. Det er rett og slett ein oppdikta telefonsamtale som ho påstår å ha hatt med meg, seier England.
Då barnet kom på sjukehus, synte det seg at den sju veker gamle jenta hadde både RS-virus og alvorleg lungebetennelse.
- LES OGSÅ:
- LES OGSÅ:
(Artikkelen held fram under biletet)
Ber legen beklage
I ettertid, og sjølv om lydloggen viser at det var sjukepleiaren som rekvirerte ambulansen, påstår legen sjølv å ha gjort det. Det er heilt avgjerande at legane er til å stole på, seier Svein Aarset, leiar i Rådet for legeetikk.
– Det går på både truverdet til den einskilde lege og truverdet for legane generelt, seier Aarset.
Fylkeslegen har slått fast at legen handla medisinsk uforsvarleg. Aarset oppmodar den aktuelle legen til å beklage det som har skjedd.
– Legar gjer også feil, og beste måten å handtere feil på, er å erkjenne dei feila ein gjer og beklage desse, seier Aarset.
Den aktuelle legen ønskjer ikkje å kommentere saka.
- LES OGSÅ: