I 2016 gjorde trafikken på ruta eit kjempehopp i høve til tidlegare år. Tala for juli syner at dette året vil føye seg inn i selskapet på toppen av lista.
– Det var fleire grunnar til den gode trafikken i fjor, blant anna valutakursen. Så me var spente på om dette året ville innfri like mykje, seier Frank Eldegard som er styreleiar for den naturskjøne vegen.
Dårleg start
I mai og juni såg det ikkje ut som at inneverande år skulle slå nokre rekordar.
– Me hadde litt nedgang både i mai og juni, så det såg litt dårleg ut. Men juli har vore kjempegod. Det har passert tusen fleire bilar enn same månad i fjor, fortel Frank Eldegard.
For å slå fjoråret må dei opp i over 40 000 passeringar på vegen.
– No er me à jour med rekordåret i fjor. Så det kan bli ny rekord.
Mange nordmenn
Det har vore ei kraftig auke i talet på nordmenn som reiser i eige land den første delen av dette året.
Nordmenn er også dei Frank Eldegard ser flest av på vegen til Jotunheimen.
– Mange fartar rundt i nærområdet sitt. Ruta er også mykje brukt mellom Bergen og Trondheim. Eg har også kjensla av at mange brukar den når dei er på ferie i Norge, seier Eldegard.
I tillegg er det ser han mykje til asiatar i leigebilar. Spesielt kinesarar er ei folkegruppe som har lagt sin elsk på Norge som ferieland i år.
– Dessutan er det masse andre skandinavar, og nederlendarar likar veldig godt å køyre i fjellheimen.
Hausten må også innfri om Tindevegen skal tikke inn eit nytt rekordår. Styreleiaren er ikkje hundre prosent sikker på at det held til mål.
– Me har ein del inngrep me må gjere på vegen i haust, som kan redusere trafikken noko. Men det kan hende me får rekord likevel. Me får sjå.