Trur vindmøller skremmer turistane

– Det er klart at det ikkje er noko kjekt å sitje i stova på hytta og sjå rett inn i ei roterande vindmølle, seier Leiv Henriksbø i Nettverk mot vindmøller i Gulen.

Nettverket er ei gruppe av fastbuande og hytteeigarar som fryktar for hytteturismen dersom kommunen bestemmer seg for å satse på vindkraft. Temaet er i vinden i heile fylket, og i Gulen sin nabokommune Solund har forkjemparane og motstandarane kjempa ein hard kamp.

Hyttefolket fortvilar

I Gulen er fire vindmølleparkar føreslått bygde ut i Sandøy, Dalsbotn, Setenesfjellet og Brosviksåta. Henriksbø meiner desse vil rasere kystlandskapet.

Gulen har fleire hytter enn hus for fastbuande, og Henriksbø trur vindmølleparkane kan øydeleggje for ei viktig næring i kommunen.

– Hyttefolket her fortvilar over det som kan bli øydelagd utsikt viss vindmøllene kjem. Og kven vil vel byggje hytte i eit slikt landskap? spør Henriksbø.

• LES OGSÅ: Vindkraftforkjemparar gir seg ikkje – ber NVE seie ja til vindindustri
• LES OGSÅ: Seier nei til vindmøller

Ville aldri feriert i vindmøllelandskap

Også vanleg turisme er truga, trur Henriksbø. Han viser til undersøkingar gjort av Vestlandsforsking, som viser at turistar ikkje vil kome tilbake til område med vindmøller.

Rorbuene i Gulen er populære blant tyske turistar om sommaren. Henriksbø skjønar det godt om dei tek ferien andre stader viss det blir vindparkutbygging.

Artikkelen held fram under biletet.

– Eg ville no aldri ha kome hit sjølv. Har du sett éi vindmølle har du sett alle, og dei er uansett ikkje noko å sjå på, seier Henriksbø.

Meiner miljøargumentet er ein bløff

Men han ottast ikkje berre for dei visuelle kostnadene. Henriksbø meiner framstillinga av vindmøller som miljøvennlege er ein regelrett bløff.

– Det er ein bløff fordi du ikkje sparer CO2-utslepp, tvert imot gir vindparkbygging auka utslepp. Dessutan står møllene stille om vinteren, og då må vi importere kôlkraft, gasskraft og kjernekraft frå utlandet for å dekke straumbehovet, seier Henriksbø.

• LES OGSÅ: Nytt vindkraft-nei i Solund
• LES OGSÅ: Klart Bremanger-ja til vindkraft

Liknar straumeksport med u-hjelp

Vindparkane har planar om å eksportere vindkraft til Mellom-Europa. Han meiner Sogn og Fjordane sitt mål om å bli størst på vindkraft i landet er eit svik mot skattebetalarane.

– At norske straumkundar skal finansiere krafteksport til andre land medan dei sjølve må betale høge straumprisar, heng ikkje på greip, seier Henriksbø.

Han samanliknar vindkrafteksporten med utviklingshjelp.

– Kvifor skal vi som har dei kaldaste vintrane i Europa subisdiere billeg straum andre stader? Det kjem då ikkje noko u-hjelp frå dei til oss, seier han.

• LES OGSÅ: Seier ja til 48 nye vindmøller

– Største øydelegging sidan istida

Nettverk mot vindmøller i Gulen meiner eit ja til vindparkutbygging kan medføre den største naturøydelegginga sidan siste istid. Henriksbø fortel at dei ikkje vil sitje stille og sjå på dersom kommunen vedtek utbygging.

– Vindkraft på land er vi heilt imot. Kanskje kan vi tole éin vindpark, men heile fire utbyggingar kan vi rett og slett ikkje leve med, fortel Henriksbø.

• LES OGSÅ: Her seier dei ja eller nei til vindkraft

Vil klage på vindmølle-ja

Viss vindmølleparkane får gjennomslag i Gulen, vil nettverket ikkje sitje stille og sjå på.

– Då kjem vi til å klage saka inn for Olje- og energidepartementet. Men eg håpar og trur dette ikkje blir naudsynt, seier han.