Mentaltrenar: – Dette kan ha vore årets viktigaste siger for Sogndal

– Laget bør ikkje vere redde for at dei tar heilt av. Det er i så fall berre bra og viktig for energien i gruppa, seier Åsli.

Han er konsulent hos Bertrand som driv mental trening retta mot toppidrett, næringsliv, forsvar og politi.

– Skaper ein ny «drive» i heile laget

Etter 11 kampar utan siger, vart det endeleg full klaff på heimebane då Sogndal møtte Haugesund på Fosshaugane Campus laurdag. Med 4-1-siger i skjebnekampen kunne både lag og supporterar puste letta ut og sjå at Sogndal igjen karra seg over nedrykksstreken.

• LES OGSÅ: Sogndal leika seg tilbake på vinnarsporet

Åsli er ikkje redd for at sogndølane vil ta for lett på dei resterande kampane i serieinnspurten.

– Det skaper ein ny «drive» i heile laget. Eg trur ikkje det noko fare for at dei misser bakkekontakten, dei veit jo at dei framleis ligg i nedrykksstriden, seier den mentale trenaren.

Vekkaren laget trengde?

Åsli peikar på at 4–1 sigeren på Fosshaugane viser at Sogndal framleis kan vinne, og meiner det er viktig at laget dyrkar energien etter helgas kamp i komande kampar.

– Det er klart at dette var ein ekstremt viktig siger, mentalt sett. Fordi dei kjem seg litt ovanpå. Dei viser at dei kan. Det kan ha vore årets viktigaste siger for Sogndal.

Med 24 poeng og kvalifiseringsplass – treng Sogndal å sanke poeng også i dei resterande fem kampane denne sesongen. Helst minst 30 poeng.

Åsli trur laurdagens kamp kan ha vore ein vekkaren laget treng.

– Når ein ikkje vunne i 11 kampar på rad, og du ligg i nedrykksstriden i Tippeligaen, då treng ein å få tilbake trua på seg sjølv. Det er kanskje nettopp derfor dei plutseleg vinn ein så viktig kamp. Det går opp for dei kollektivt at no er presset der.

• LES OGSÅ: Har varma benken i månadsvis – no vil Kenneth Udjus behalde keeperplassen

Flo: – Vi kan ikkje ta heilt av

Spelarane sjølv var letta etter kampen mot Haugesund, men då Sogndal-spiss Ulrik Flo møtte presse etter kampen, streka han under at dei ikkje vil miste bakkekontakt av den grunn.

– Vi kan ikkje ta heilt av etter denne sigeren. Mange har uttala seg om at toget er gått og at vi er ferdige, og at no blir det nedrykk. No skal ikkje seie at vi klarer oss, men vi må ta med oss det positive, sa Flo til NRK.no.

Åsli på si side, trur ikkje laget har noko å tape på å gire seg sjølv opp litt.

– Eg ville ikkje vore redd for at dei tek av, eg trur heller det er positivt. Kanskje dei får tilbake trua på seg sjølve, seier den mentale trenaren.

• Her finn du terminliste og oppdatert tabell for eliteserien