Tek opp arven: – Vi trur bygda set pris på dette

– Ja, vi må jo halde tradisjonen ved like!

Sindre Flatjord fortel at når ingen hadde tenkt å lagge flagget som byrjar verte ein tradisjon høgt oppe i fjellet over Gloppefjorden, så måtte dei trø til. To av årets fire flaggskaparar er brørne til dei som laga flagget i fjor.

– Det er veldig kjekt å sjå resultatet. Dette er ei triveleg markering for bygda, trur eg, seier Flatjord.

• LES OGSÅ: Slik gjorde brørne det: – Ein må ofre seg litt for landet
• LES OGSÅ: Det starta i 2012: – Vi ville heidre landet

Hardt arbeid, men verdt det

Han fortel at dei var oppe både torsdag og fredag 16. mai for å spraye fjellet med raudt, kvitt og blått.

Tre timar torsdag og fem timar fredag gjer at han og kameratane har brukt godt over ein arbeidsdag på prosjektet.

– Det tek ein del tid, men det er no berre artig, seier Flatjord.

Til saman var dei fire personar i fjellsida. Forutan Sindre Flatjord, som er bror til Ole Martin Flatjord som var med i fjor, bidrog Jon Andreas Kornberg, Hans Kristian Seim Arnestad og Runar Hellerud, bror til Eirik Hellerud som deltok i fjor.

– Fin måte å markere nasjonaldagen

Dei nytta same metode som brørne, med ryggsprøyter med plass til fem liter eller meir med farga vatn. Til saman har hundrevis av liter gått med til flagget.

– Det er 38 meter i breidda og over 20 meter høgt, seier Flatjord.

I går var flagget synleg frå andre sida av fjorden.

– Det har regna i løpet av natta, så eg er ikkje sikker på kor godt ein ser det no. Men vi ser det frå bygda, seier Flatjord.

Han trur tradisjonen kjem til å leve vidare.

– Det er ein fin måte å markere nasjonaldagen på.

Her kan du sjå video frå korleis dei jobbar: