Trolsk julinatt på Jølster

– This is magic, seier Goalnoosh Salehi og Mahsa Vahdat om konsertlokala. Dei har akkurat halde konsert i ei av stovene på Jølstramuseet i Jølster.

På den varmaste natta i sommar har Førdefestivalen etablert faste konsertområde i Jølstramuseet. Dei har også konsertar i 8 andre kommunar.

• Les også: Bli med bakom kamera på TV-konsert

Etablerte konsertlokale

På Jølstramuseet er fleire musikarar og grupper samla, og held konsertar i dei tradisjonelle og gamle stovene på tunet. Denne jølsternatta har folk henta fram sommarkleda, og i det frodige og blomsterrike terrenget kan folk slappe av mellom husa og nyte tonane og rytmane frå dei små husa blandar seg.

Dei to iranske artistane Salehi og Vahdat har akkurat spelt ein halvtimes konsert i ei av dei eldgamle jølstrastovene, der tradisjonelle trefigurar og åkle har omgitt artistane som sjølv stilte i typiske fargeklare drakter frå Iran.

– Alle er så vennlege og atmosfæren er så spesiell – hyggeleg, seier dei to. Dei har allereie tatt tallause sjølvie-bilete der dei prøver å forevige inntrykka.

Fulle hus

Kommunikasjonssjef Torill Faleide løftar lett på ein fot for å piske vekk myggen som også har vakna til live. Likevel er dette ein perfekt kveld.

– Det er heilt fullt her. Det er ikkje ein einaste billett å oppdrive. Det er heilt fantastisk, den andre konserten i dag som er utseld. Alt går så bra, seier ho.

Nokre har reist lengre enn andre til konserten. Angela Lu kjem frå Kina.

– Vi har reist frå Kina. Denne konserten er heilt annleis enn venta. De har eit fantastisk rikt kulturliv. Det er veldig fascinerande, seier Lu.

Ho slit likevel med å forstå alt som vert sagt.

– Fleire ting burde kanskje vore kommunisert på engelsk. Vi forstår jo ikkje norsk. Så tidvis forstår vi ikkje kva vi skal vere med på. Det ville truleg også appellere til eit større og meir internasjonalt publikum om meir vart kommunisert på engelsk, meiner ho.

• Les også: Sjå vassdokketeater frå Førdefestivalen

Tradisjon trollbatt

Det er varmt også inne i dei normalt kalde sperrestovene. I kveld er dei fylte til trengsel av folk som vil sjå og høyre. Medan nokon går inn, går andre ut. Brørne Ole og Knut blir møtt av ei fullsett sperrestove. Dei fortel om oppveksten der tonane frå langeleiken til ein onkel inspirerte dei.

– Det kan ikkje vere standard høgde på desse dørene her. Kommentaren fell frå ein av gjestene i det han går ut av ei av dei gamle stovene på Jølstramuseet, etter å ha høyrt indiske tonar frå sarangimusikaren frå India.

Jølstringane var ikkje små – dørblada var låge for at dei skulle helse ubedne gjester velkomne med eit kakk i hovudet viss nokon våga seg innom døra. Så seier soga.

• Les også: Sparka i gong Førdefestivalen med tur og tonar