NRK Meny
Normal

Trivst godt med underdogsstempelet

SOGNDAL (NRK): Det er vel heller regelen, enn unnataket. Sogndal Fotball er spådd ein svært tung comebacksesong i Eliteserien.

Rune Bolseth på trening i Sogndal

KLARE: Med sesongopninga borte mot Bodø/Glimt i helga, startar Sogndal-spelarane med å motbevise pessimistiske spådomar. – Eg trur vi vil overraske i år, seier kaptein, Rune Bolseth (i midten).

Foto: Oddleif Løset / NRK

– Vi visste at vi ville hamne på dei tre-fire siste plassane, uansett korleis vi har sett ut i vinter. Etter at vi rykka opp mot Hønefoss i november i fjor, har vi vore vel klar over at det ville komme. Uansett korleis vi såg ut i vinter, humrar «sjuande far» i Sogndal-troppen, kaptein Rune Bolseth (35).

– Men vi har planer om å gjere tipsa til skamme, legg han til.

– Som venta

Som Sogndals eldstemann er det ikkje første gang at sandensaren kommenterer tabelltipsa før toppfotballen byrjar å rulle att.

Dei aller fleste tippar ein svært tung sesong. Bettingselskapa kjenner seg tryggast på at heislaget vil vere tilbake i 1. divisjon neste sesong. Tipsa er som venta, seier Bolseth.

– Vi er nyopprykka og minst i klassen i høve budsjett og storleik på bygda, seier Bolseth.

VG og TV2 positive

Mest optimistisk er Romsdals Budstikke og Bergens Tidende, med Sogndal på 9. og 10.-plass. I VG trur sportsjournalist Knut Espen Svegaarden at Eirik Bakke vil leie Sogndal til fornya eliteseriekontrakt, i sin første sesong som trenar i eliteserien.

– Fire lag skil seg ut i toppen, og fire på midten. Så er det åtte jamne lag på nedre halvdel. Vi føler tre-fire lag er minst like svake som Sogndal, seier han.

– Dei hadde ein bra sesong i fjor, vann Obos-ligaen overlegent. Dei har også eit bra innspelt lag, sjølv om dei har mista nokre sentrale spelarar, legg han til.

Elskar

– Men mest interessante er at Sogndal er annleis på to andre område. Dei har funne sin plass, og aksepterer at dei går opp og ned. Og så elskar dei å bli tippa ned, seier Svegaarden.

Det seier Bolseth seg samd i. VG var mellom dei som i 2004 og 2014 stilte høgare forventingar til Sogndal. Begge sesongane enda i nedrykk.

– Er det litt godt å bli tippa nord og ned att, Bolseth?

– Ja, det spørst om det ikkje er ein fordel for oss. Vi trivast godt med underdogstempelet. Men eg trur ikkje det har noko å seie.

– Vi vil overraske

– Vi er mest opptekne av kva vi gjer i kvardagen og korleis vi skal utvikle oss som lag. Så får vi telje opp i november, held Bolseth fram.

– Kvifor skal Sogndal gjere det betre enn nedrykksplass?

– Vi jobba godt i heile fjor, har same gode trenarteamet som i fjor og så er det ikkje i spelarstallen i Sogndal at det har vore største utskiftingar i Tippeligaen. Vi er ein bra stamme som vil noko heile gjengen. Eg trur vi vil overraske.

Bønder føler seg ikkje trygge på vegen med traktor
Orkanen Tor var ikkje ekstrem nok
Ordninga bør endrast