– Vi har over fleire tiår latt vegnettet vårt forfalle. Vi har brukt for lite pengar på vedlikehald på både riks- og fylkesvegane, seier avdelingsdirektør Nils Magne Slinde i Statens vegvesen region vest.
Etaten har no kartlagt heile det norske vegnettet.
– Berre for fylkesvegane i Sogn og Fjordane snakkar vi om eit etterslep på 4 milliardar kroner. Vi skulle ønskt at vi fekk rusta opp vegnettet vårt slik at vi fekk tilbydd trafikantane våre langt betre forhold, opplyser Slinde.
Fylket tok over i 2010
Fylkeskommunane overtok frå 1. januar 2010 det meste av det gamle riksvegnettet frå staten. I dag er det berre E39, E16, rv 15, rv5 og deler av rv 13 og deler rv 55 (Hella - Lom) som blir finansiert av staten.
– Fylkeskommunen har gitt løyvingar som gjer at vi har vore i stand til å halde forfallet på det nivået det har vore, men det har ikkje vore mogleg å redusere forfallet eller ta att noko av det som var forsømt frå før.
Han seier den største utfordringa er dei mange tunnelane. 2,6 av dei 4 milliardar kronene trengs til tunnelane. Berre Høyangertunnelen åleine vil koste 370 millionar kroner, dersom den skal oppgraderast til riksvegstandard anno 2013.
Tunnelane kostar mest
– Vi må finne ut kva som er akseptabel standard. Rapporten legg opp til ei opprusting av fylkesvegtunnelane til riksvegstandar. Og det er eit sterkt ønske å ha både radio- og mobildekning i tunnelane.
I tillegg til tunnelane, står det på langt nær bra til med resten av vegnettet.
– Vi ser mykje telehiv og teleskade som gjer at vegnettet ikkje er tilfredsstillande for brukarane.
Ber om pengar frå staten
Avdelingsdirektøren er klar på at det bør komme ei statleg tilskotsordning for vedlikehald av fylkesvegane, på samme måte som rassikring får tilskot.
– Vi er spente på å høyre kva regjeringa og Stortinget meiner om eit slikt forslag. Vi ser at det ikkje er tatt nok høgde for forfallet på fylkesvegnettet. Skal ein få gjort noko med dette i overskueleg framtid, må ein kanskje tenke på tilsvarande måte som ved rassikring, seier Slinde.